Senatorlar gektarlap julynyp jatqan shuǵynyq gúliniń taǵdyryna alańdaýly

NUR-SULTAN. QazAqparat - Álemde sırek kezdesetin shuǵynyq gúlinen aıyrylyp qalýymyz múmkin. Bul týraly búgin Senatta ótken «Qazaqstandaǵy bıologııalyq alýantúrliliktiń saqtalýyn zańnamalyq qamtamasyz etýdiń ózekti máseleleri» atty Úkimet saǵatynda senator Muhtar Qul-Muhammed aıtty, dep habarlaıdy QazAqparat tilshisi.

«Ótken jyly Shyǵys Qazaqstan oblysyna barǵan kezde mynandaı bir jaǵdaıǵa tap boldyq. Bizdiń ata-babalarymyzben birge myńdaǵan jyl boıy jasap kele jatqan bir kıeli shóp, gúl bar. Onyń aty shuǵynyq dep atalady. Shuǵynyq gúli Qytaı taýlarynda, Tarbaǵataıda, ishinara Alataýda ósedi. Ortalyq Azııada basqa birde-bir jerde kezdespeıdi. Qazirgi kezde osy gúldiń tamyryndaǵy bir qurtty alý úshin, júzdegen gektar shuǵynyqtyń taýdyń etegindegi alqaby qurtylyp ketip jatyr. Odan qytaılar dári jasaıdy eken», -dedi Muhtar Qul-Muhammed.

Senator eger dál osyndaı jabaıy jolmen gúlderdi qurtý jalǵasatyn bolsa, onda biz álemdegi sırek kezdesetin gúldiń osy túrinen aıyrylyp qalýymyz múmkin ekendigin basa aıtty.

«Búginde memleketimizdiń keń baıtaq dalasynda ósimdik kóp. Ókinishke oraı, bizde ósimdik álemin tek qana erekshe qorǵalatyn tabıǵı qoryqtarda qorǵaımyz. Qalǵan jerlerde, 70 mln jerimizdiń 60 mln jerindegi shóp eshqandaı zańmen qorǵalmaıdy», - dedi osy máselege qatysty jaýap bergen QR Ekologııa, geologııa jáne tabıǵı resýrstar vıtse-mınıstri Erlan Nysanbaev.

Onyń aıtýynsha, elimizdiń búkil aýmaǵyndaǵy ósimdikterdi qorǵaý úshin «Ósimdik álemi týraly» zań qabyldaý qajet. Qazirgi ýaqytta mundaı zańnyń tujyrymdamasy daıyndalyp ta jatyr

«Zań qabyldanǵannan keıin elimizdiń kez kelgen jerindegi ósimdik álemin qorǵaýǵa múmkindik týady. Búgingi kúnge qatysty aıtar bolsaq, shuǵynyq gúlin qorǵaý úshin aımaqtarǵa naqty tapsyrmalar berilgen, baqylaýda. Qyzyl mııany da baqylaýda ustap otyrmyz», - dedi vıtse-mınıstr.