Senatorlar erkin ekonomıkalyq aımaqtar týraly zańdy maquldady
Atalǵan zań jobasy boıynsha baıandama jasaǵan senator Álibek Náýtıevtiń aıtýynsha, kelisimge ózgerister engizý 2018 jyly erkin keden aımaǵynyń kedendik rásimin qoldanýdy retteıtin Eýrazııalyq ekonomıkalyq odaqtyń jańa Keden kodeksiniń qabyldanýyna baılanysty.
«Hattamaǵa sáıkes kelisimnen kedendik quqyqtyq qatynastardy retteıtin jáne Eýrazııalyq ekonomıkalyq odaqtyń Keden kodeksinde bekitilgen normalar alynyp tastalady. Sondaı-aq, Eýrazııalyq ekonomıkalyq odaq týraly sharttyń jáne odaqtyń Keden kodeksi normalaryna sáıkes termınologııany ózektendirý kózdeledi. Hattamaǵa sáıkes erkin keden aımaǵynyń kedendik rásimi qoldanylatyn Arnaıy ekonomıkalyq aımaq aýmaǵy, osy Odaqqa múshe memlekettiń zańnamalaryna sáıkes aıqyndalady. Erkin keden aımaǵynyń, kedendik rásimi qoldanylatyn Arnaıy ekonomıkalyq aımaq aýmaǵynda, erkin keden aımaǵynyń kedendik rásimimen engizilgen sheteldik jáne Odaqtyń taýarlary ornalastyrylýy múmkin. Sonymen qatar, Odaqqa múshe memleketterdiń zańnamalaryna sáıkes, tyıym salynǵan taýarlardy qospaǵanda, sheteldik jáne Odaqtyń ózge de taýarlary bolýy múmkin», - dedi ol.
Senatordyń atap ótýinshe, hattamada Odaqqa múshe memleketterdiń zańnamalaryna sáıkes Arnaıy ekonomıkalyq aımaq aýmaǵynda keıbir sanattaǵy taýarlardyń bolýyna jáne paıdalanylýyna tyıym salý múmkindigi kózdeledi. Hattama talaptary boıynsha Arnaıy ekonomıkalyq aımaqqa tirkelgen rezıdent mindetti túrde Eýrazııalyq ekonomıkalyq odaqtyń saıtynda kásiporyn málimetterin jarııalaý qajettigi jáne erkin keden aımaǵynyń kedendik rásimderi odaqtyń Keden kodeksine sáıkes qoldanylatyndyǵy qarastyrylǵan.
«Kelisimdi ratıfıkatsııalaý týraly Zańnyń qabyldanýy teris quqyqtyq, áleýmettik – ekonomıkalyq saldarǵa ákep soqpaıdy. Zań jobasy boıynsha Senattyń turaqty komıtetterinen eskertýler men usynystar bolǵan joq», - dedi Álibek Náýtıev.