Senatorlar elorda kóshelerine júzden astam aǵash otyrǵyzdy

NUR-SULTAN. QazAqparat - Senat depýtattary men Palata apparatynyń qyzmetkerleri dástúrli jalpyqalalyq senbilikke qatysty. Olar elordanyń Qoshqarbaev jáne Táýelsizdik dańǵyldary qıylysynda, Áziret Sultan meshitiniń janynda júzden astam qaraǵaı, qaıyń men balqaraǵaı aǵashtaryn otyrǵyzdy, dep habarlaıdy QazAqparat Palatanyń baspasóz qyzmetine silteme jasap.

«Qazirgi tańda elimizde Prezıdentimizdiń bastamasymen «Jasyl Qazaqstan» ulttyq jobasy iske asyrylyp jatyr. Sonyń aıasynda aýanyń sapasyn jaqsartý, 2 mlrd aǵash otyrǵyzý, ózen-kólderdiń ekojúıesin saqtaý, sý resýrstaryn durys basqarý sııaqty birqatar naqty shara qolǵa alynyp, aýqymdy jumys atqarylyp jatyr. Bizdiń búgingi ekologııalyq aktsııamyz da osy baǵyttaǵy ıgilikti iske qosqan úlesimiz ekeni sózsiz»

, – dedi Parlament Senatynyń tóraǵasy Máýlen Áshimbaev.

Palata tóraǵasy Memleket basshysynyń ekologııalyq bastamalardy iske asyrýǵa arnalǵan tapsyrmalaryn oryndaý úshin senatorlar belsendi jumys isteýge daıyn ekenine nazar aýdardy. Atap ótkenindeı, ekologııalyq problemalardy sheshý - jalpyulttyq kún tártibindegi negizgi basymdyqtardyń biri.

«Aldaǵy ýaqytta Parlament Senaty ekologııalyq bastamalardy zańnamalyq turǵydan qoldaý jumystaryn jalǵastyra beredi. Bul baǵytta biz ekolog mamandarmen, sarapshylarmen, qoǵamdyq jáne halyqaralyq uıym ókilderimen birlese áreket etýge múddelimiz»

, – dedi Senat Spıkeri.

Buǵan deıin jazǵanymyzdaı, búgin Memleket basshysy Qasym-Jomart Toqaev «Birge - taza Qazaqstan» respýblıkalyq ekologııalyq aktsııasynyń aıasynda elordadaǵy Botanıkalyq baqta kóshet otyrǵyzyp, qalalyq senbilikke qatysty.