Senatorlar el óńirlerin aralap, jurtshylyqpen júzdesti
Parlament Senatynyń depýtattary Álı Bektaev, Murat Qadyrbek jáne Alısher Satvaldıevtiń sapary Qazyǵurt aýdanynda jalǵasty. Óner mektebinde jergilikti turǵyndarmen bolǵan kezdesýge ardagerler keńesiniń músheleri, kásipkerler men sharýalar, aýdandyq máslıhat depýtattary jáne qoǵamdyq uıym ókilderi qatysty. Senatorlar kezdesý barysynda qabyldanǵan ulttyq jáne halyqaralyq zańnama baptary men oǵan engizilgen tolyqtyrýlar týraly jınalǵandarǵa jan-jaqty túsindirip, óńirdegi máseleler boıynsha pikir almasty. Áńgime barysynda memlekettik shekaranyń tozǵan baǵanasyn, joldardy, kúrdeli jóndeýdi qajet etetin nysandardy retke keltirý, sondaı-aq aýdanda týrızm salasyn damytý, kásipkerlikti qoldaý jáne sharýalarǵa tómen paıyzben nesıe berý sııaqty taqyryptar qozǵaldy.
Senatorlar óz kezeginde kóterilgen barlyq másele Parlamenttiń aldaǵy sessııasy barysynda nazarda bolatynyn atap ótti. Parlamentshiler sonymen qatar Sharbulaq aýyldyq okrýginiń Aqbastaý eldi mekenindegi 150 oryndyq mektepke baryp, qosymsha salynyp jatqan aýyzsý qoımasy qurylysynyń barysymen tanysty.
***
Parlament Senatynyń depýtattary Nurlan Beknazarov penAıgúl Qapbarova Shymkent qalalyq máslıhat depýtattarymen jáne qoǵamdyq keńes múshelerimen kezdesti. Senatorlar elimizdiń Prezıdenti belgilegen memlekettiń negizgi basymdyqtary jáne VIII shaqyrylymnyń birinshi sessııasynda qaralǵan zańdardyń basty erejeleri týraly aıtyp berdi.
Qalalyq máslıhat depýtattary men qoǵamdyq belsendiler kezdesý barysynda áleýmettik tólemderdiń mólsheri men tártibine, qala aýmaǵyndaǵy ınfraqurylymdy damytýǵa, gaz jetkizýge, jańa jumys oryndaryn ashýǵa, ishki naryqty qorǵaýǵa, káriz júıelerin tazartýǵa qarjy bólýge jáne t.b. mańyzdy máselelerge qatysty suraqtar qoıdy. Depýtattar kezdesýlerde kóterilgen máselelerdi baqylaýda ustaıtynyn jáne Úkimetpen birlesip olardy sheshý joldaryn ázirleıtinin atap ótti.
***
Senat depýtaty Rýslan Rústemov Qyzylorda oblysyndaǵy Jalaǵash aýdanynda boldy. Senator jurtshylyqpen kezdesý barysynda Senatta maquldanǵan zańdar týraly aıtty jáne turǵyndardyń suraqtaryna jaýap berdi. Jergilikti turǵyndar óz kezeginde Jalaǵash, Qarmaqshy, Qazaly aýdandaryndaǵy Aqqyr, Shobanqazǵan, Káýkeı aýyldaryna shekara mańy aımaǵynyń mártebesin bekitý, Júrgenov aýylynda mádenıet úıin salý jáne «Dıplommen – aýylǵa» baǵdarlamasyn jetildirý máselesin kóterdi.
***
Parlament Senatynyń depýtaty Bekbolat Orynbekov Jambyl aýdanynda boldy jáne Tastóbe aýylyndaǵy «Qyzyldıhan» óndiristik kooperatıviniń jumysymen tanysty. Kásiporyn basshylyǵy kooperatıvte aýyl sharýashylyǵyndaǵy jumysty jalǵastyrý úshin qajetti tehnıkanyń jetkilikti ekendigi týraly habardar etti. Júzdesý barysynda qyzmetkerlerdiń jaǵdaıyn jaqsartýǵa da basymdyq beretini de aıtyldy. Sapar barysynda senatorǵa daladaǵy jumys barysy kórsetildi. Aýdan ákiminiń aıtýynsha, kooperatıv qaramaǵyndaǵy jerdiń jalpy aýdany – 1 875 gektar. Kooperatıv basshylary 1 745 gektar aýyl sharýashylyǵy alqabyn paıdalanady. Búginde Tastóbe aýylynyń elý turǵyny kásiporynda jumys isteıdi. Senator óz kezeginde Jambyl aýdanynyń turǵyndaryna Parlament Senatynyń qyzmeti jáne ótken sessııa kezeńinde júrgizilgen jumys týraly aıtyp berdi.
***
Senat depýtaty Bekbol Orynbasarov Mańǵystaý oblysyndaǵy jumysy aıasynda áleýmettik nysandardy aralady jáne kásiporyndardyń eńbek ujymdarymen áńgimelesti. Senator «Aqtaý teńiz porty AEA» AQ-da bolǵan kezde arnaıy ekonomıkalyq aımaqtyń jumysymen jáne ony odan ári damytý josparymen tanysty. Depýtat ekonomıka salalaryndaǵy qoldaý sharalaryna túsinikteme berdi jáne óńdeý ónerkásibin odan ári damytýǵa baǵyttalǵan negizgi tetikterge toqtaldy. Depýtat sapar barysynda «Atameken» óńirlik kásipkerler palatasynyń basshylyǵymen de kezdesti. Kezdesýde kásipkerlik salasyn damytý, otandyq jáne sheteldik ınvestorlardy tartý máseleleri talqylandy. Senator sondaı-aq ártúrli problemalyq máseleler boıynsha turǵyndardy da qabyldady.
Depýtat «Kaspıı tuşylandyrý zaýyty» JShS-de boldy jáne tuşylandyrý zaýytyn keńeıtý jobasymen tanysty. Zaýytta jańǵyrtý jumystary aıaqtalǵannan keıin táýligine 40 myń tekshe metr teńiz sýyn tuşytýǵa múmkindik beretini aıtyldy. Bekbol Orynbasarov atalǵan kásiporynnyń mańyzyn atap ótip, jóndeý-ornatý jumystarynyń jaqyn arada sátti aıaqtalatynyna senim bildiretinin jetkizdi.
***
Parlament Senatynyń depýtaty Aınur Arǵynbekova Semeı qalasyndaǵy «Jylýkomýnenergo» MKK-de boldy jáne 2023-2024 jyldarǵa arnalǵan jylytý maýsymyna daıyndyq josparymen tanysty.
Senator qaladaǵy qazirgi jylý kózderi týraly jan-jaqty habardar boldy. Oǵan sonymen qatar №1 jylý energetıka ortalyǵy kórsetildi jáne jergilikti 92 qazandyqtyń keıbiri kúrdeli jóndeýdi qajet etetini týraly aıtyldy. Depýtatqa jylý berý maýsymyna daıyndyq jumystary aıasynda aýqymdy jumys atqarylǵany, atap aıtqanda «Ǵabbasov» qazandyǵy qaıta jańartylǵany jáne jalpy aǵymdaǵy jóndeý jumystary jalǵasyp jatqany týraly habarlandy.
Depýtat Arǵynbekova óz kezeginde jergilikti bılik bul máseleni baqylaýda ustaýy tıis ekendigi jáne jylý kózderi men jylý jelisiniń jaı-kúıine turaqty tekserý júrgizý qajettigin atap ótti.