Qazaqstan Aral máselesin Ózbekstanmen birlesip sheshpek

<p>ASTANA. KAZINFORM - Búgin Senat spıkeri Máýlen Áshimbaevtyń tóraǵalyǵymen Palata bıýrosynyń otyrysy ótti. Bul týraly Senattyń baspasóz qyzmeti habarlady.</p>

Onda depýtattar 24 qazan kúni ótetin Senat otyrysynyń kún tártibin bekitti jáne palatanyń aldaǵy jumys josparyn pysyqtady.

Kún tártibine sáıkes aldaǵy beısenbide Senat otyrysynda «Qazaqstan Respýblıkasynyń Úkimeti men Ózbekstan Respýblıkasynyń Úkimeti arasyndaǵy ekologııa jáne qorshaǵan ortany qorǵaý salasyndaǵy yntymaqtastyq týraly kelisimdi ratıfıkatsııalaý týraly» zań qaralady.

Kelisim Aral basseınindegi ekologııalyq ahýaldy jaqsartýdy kózdeıtin birlesken is-sharalar ázirleýge, qorshaǵan ortany qorǵaý salasyndaǵy yntymaqtastyqty damytýǵa jáne eki eldiń qarym-qatynasyn odan ári arttyrýǵa baǵyttalǵan.

Sondaı-aq Bıýro otyrysynda Palata depýtattarynyń «Damý» Kásipkerlikti damytý qory» AQ basshylyǵymen bolatyn aldaǵy kezdesýine qatysty máseleler talqylandy. Atalǵan is-sharada memlekettik qoldaýǵa ıe bolǵan kásipkerlik sýbektileriniń basym jobalary jóninde sóz qozǵalmaq.

Máýlen Áshimbaev atap ótkendeı, Memleket basshysy Qazaqstannyń kásipkerlik belsendiligin arttyrýǵa únemi erekshe mán berip keledi. Osy rette Prezıdent kótergen máselelerdi jan-jaqty zerttep, talqylap, olardy sheshý jolynda birlesip áreket etken jón.

Sondaı-aq Bıýro otyrysynda Májilisten kelip túsken zańdar jumys úshin turaqty Komıtetterge bólinip berildi.