Senatorlar bir kúndik jalaqylaryn Jambylda jarylystan zardap shekkenderge aýdardy

NUR-SULTAN. QazAqparat – Senat depýtattary Jambyl oblysy Baızaq aýdanyndaǵy tótenshe jaǵdaıdan zardap shekkenderdi qoldaý qoryna bir kúndik jalaqylaryn aýdarady, dep habarlaıdy QazAqparat tilshisi.

«Jambyl oblysy Baızaq aýdanynda bolǵan tótenshe jaǵdaı bárimizdiń qabyrǵamyzdy qaıystyrdy. Búgingi kúni Prezıdenttiń tapsyrmasymen jarylys saldarynan qaza bolǵan azamattardyń otbasylaryna jáne zardap shekken adamdarǵa kómek kórsetilýde. Osyǵan oraı, Senat depýtattarynyń bir kúndik jalaqysyn zardap shekkenderdi qoldaýǵa arnalǵan qorǵa aýdarý týraly usynys bar. Qarsylyq joq bolsa, osy usynysty qabyldaımyz, apparat tıisti jumystardy uıymdastyrady», - dedi M. Áshimbaev Senattyń búgingi otyrysynda.

Esterińizge sala ketsek, 26 tamyzda saǵat shamamen 19:00-de Jambyl oblysynyń Baızaq aýdanynda ornalasqan áskerı bólim qoımalarynyń birinen órt shyǵyp, joıqyn jarylys boldy. Sońǵy málimet boıynsha, Jambyl oblysyndaǵy jarylystan 15 adam qaza tapqan.

QR Prezıdenti Qasym-Jomart Toqaev 29 tamyzdy Jalpyulttyq aza tutý kúni dep jarııalady.

27 tamyzda Memleket basshysy Qasym-Jomart Toqaev atalmysh tótenshe jaǵdaı boıynsha shuǵyl jınalys ótkizip, vedomstvoaralyq memlekettik komıssııa qurýdy tapsyrdy.

Sondaı-aq, ol Bas prokýratýra men Іshki ister mınıstrligine Jambyl oblysyndaǵy oqys oqıǵanyń mán-jaıyn jáne kinálilerdi anyqtaý úshin sotqa deıingi tergeý amaldaryn muqııat júrgizýdi júktedi.