Senatorlar Baıqońyr turǵyndarynyń shyǵyndaryn tómendetýge negizdelgen qujatty talqylady

NUR-SULTAN. QazAqparat – Parlament Senaty Ekonomıkalyq saıasat, ınnovatsııalyq damý jáne kásipkerlik komıtetiniń keńeıtilgen otyrysynda «QR Úkimeti men RF Úkimeti arasyndaǵy «Baıqońyr» keshenin gazben jabdyqtaý týraly kelisimdi ratıfıkatsııalaý týraly» zań jobasy talqylandy, dep habarlaıdy QazAqparat tilshisi.

«Baıqońyr» keshenin gazben jabdyqtaý týraly kelisim 2019 jylǵy sáýirde jasaldy.

«Kelisim tutynýshylardy suıytylǵan munaı gazynan tabıǵı gazǵa kóshirýdi kózdeıdi. Kelisimge sáıkes, tabıǵı gazǵa qala aýmaǵynda jáne «Baıqońyr» ǵarysh aılaǵynda reseılik salyq organdaryna tirkelmesten ótkizý quqyǵy «QazTransGaz Aımaq» AQ-ǵa beriledi. Bul qosarly salyq salýǵa jol bermeıdi. «QazTransGaz Aımaq» pen «Baıqońyr» qalasy tutynýshylary arasyndaǵy gazdy bólshek saýdada satý sharttary Qazaqstan zańnamasyna sáıkes jasalatyn bolady. Bul atalǵan sharttardy jasasý kezinde zańnamany qazaqstandyq nemese reseılik qoldanýǵa qatysty daýly máselelerdi boldyrmaýǵa múmkindik beredi», - dedi Energetıka vıtse-mınıstri Áset Maǵaýov.

Onyń sózine qaraǵanda, kelisimde Baıqońyr qalasynyń aýmaǵynda tabıǵı gazdy bólshek saýdada ótkizý baǵasy Qyzylorda oblysynyń gaz tutynýshylary úshin Qazaqstannyń monopolııaǵa qarsy organy belgileıtin baǵaǵa sáıkes kelýi tıis dep bekitilgen.

«Búginde Baıqońyr qalasynda 328 kóppáterli turǵyn úı, 45 jeke turǵyn úı gazǵa qosyldy, sondaı-aq úsh balabaqsha, bes jalpy bilim beretin mektep jáne kóp salaly aýrýhana tabıǵı gaz júıesimen qamtylǵan», - dedi vıtse-mınıstr.

Aıta keteıik, Baıqońyr qalasynda bir aıda as ázirleý úshin bir páter ortasha eseppen suıytylǵan gaz úshin 2856 teńge somasynda tólegen. Búginde tabıǵı gazdy paıdalaný kezinde osyndaı mólsherdegi gaz úshin turǵyndar 186 teńge tóleýde. Bul suıytylǵan munaı gazynan 15 ese tómen.

Osy kelisim turǵyndar úshin kommýnaldyq qyzmet shyǵyndaryn azaıtýǵa múmkindik beredi. Sebebi suıytylǵan gazǵa qaraǵanda, tabıǵı gazdyń quny aıtarlyqtaı arzan.