Senatorlar aýyl sharýashylyǵyna tsıfrlyq tehnologııalardy engizý máselelerin zerdeledi
Senatorlar Aýyl sharýashylyǵy mınıstrliginiń, joǵary oqý oryndarynyń ókilderimen jáne fermerlermen birlese otyryp tsıfrlandyrýdy, ǵarysh monıtorıngi tehnologııasyn engizý jáne aýyl sharýashylyǵy jerlerin qashyqtan zondtaýǵa qatysty máselelerdi talqylady.
Senat komıtetiniń hatshysy Aqylbek Kúrishbaev agrarlyq salany damytýda aýyl sharýashylyǵy protsesterin tsıfrlandyrýdyń mańyzy zor ekenin, Memleket basshysy Qasym-Jomart Toqaev óziniń Qazaqstan halqyna Joldaýynda AÓK-ke joǵary tehnologııalardy engizý mindetterin sol úshin de qoıǵanyn atap ótti.
«Aýyl sharýashylyǵyn tsıfrlandyrýdyń basty mindeti - osy ónimdi óndirýge jumsalatyn shyǵyndardy azaıtý, onyń sapasyn arttyrý jáne sybaılas jemqorlyqqa jol bermeý bolyp otyr. Bul turǵyda tsıfrlyq tehnologııalardy engizýdiń álemdik tájirıbesin qoldaný – aıtarlyqtaı ekonomıkalyq tıimdilikke qol jetkizedi», - dep atap ótti senator Aqylbek Kúrishbaev óz sózinde.
Elimizdiń aýyl sharýashylyǵy mınıstrliginiń ókilderi kezdesý barysynda osy baǵytta júrgizilip jatqan búgingi tańdaǵy jumystar týraly aıtyp berdi. AÓK memlekettik qyzmetterin damytý jáne tsıfrlandyrý departamentiniń dırektory Bernat Alpysbekovtyń aıtýynsha, elimizdiń mal sharýashylyǵyndaǵy selektsııalyq jumystar men asyl tuqymdy esepke alý protsesin tsıfrlandyrý Plem.kz saıtynda júzege asýda.
«Budan basqa, avtomattandyrylǵan «E-Agriculture« biryńǵaı júıesi qyzmetiniń arqasynda bıznes-protsesterdi tsıfrlandyrý arqyly aýyl sharýashylyǵy taýaryn óndirýshilerdiń rásimderi aıtarlyqtaı jeńildedi. Aýyl sharýashylyǵyndaǵy otandyq óndirýshiler men ishki jáne syrtqy saýdaǵa basqa da qatysýshylar memlekettik mekemelerge barmaı-aq elektrondyq ilespe qujattardy alýǵa múmkindigi bar», - dep atap ótti ol.
Kezdesýge qatysqan aýyl sharýashylyǵy taýaryn óndirýshiler ózderiniń óndiristik protsesterin tsıfrlandyrýǵa áldeqashan kiriskenderin atap ótti. Mysaly, «Atameken-Agro» kompanııasynda tsıfrlandyrý protsesi 2014 jyly iske qosyldy. Qazir olar kásiporynda jerdi qashyqtyqtan zondtaýdyń jáne egistikterge spýtnıktik monıtorıng júrgizýdiń zamanaýı júıesin paıdalanady.
Parlamentshiler Aqmola oblysyn aralaý barysynda tsıfrlyq tehnologııalardy kúndelikti ómirde qoldanatyn jergilikti qus fabrıkasynyń jumysymen tanysty. Kásiporyn alańynda jumys isteıtin ortalyq dıspetcherlik qyzmet depýtattarǵa avtoparkti basqarýdy ońtaılandyrý men beınebaqylaý júıesi jáne kólikti GPS-qadaǵalaý qurylǵysy arqyly shyǵyndardy qysqartý múmkindigin paıdalanatynyn aıtyp berdi.
«Aýyl sharýashylyǵy óndirisiniń ókilderi egis alqaptaryn ulǵaıtý, sýarý, mal sharýashylyǵy men ósimdik sharýashylyǵyn damytý turǵysynda protsesterdi tsıfrlandyrýdyń kóptegen oń mysaldaryn alǵa tartty. Shynynda da bul taqyryp asa mańyzdy. Senatorlar AÓK-ti jaqsartý jónindegi zańnamalyq bazany odan ári damytý úshin osy usynystardy paıdalanatyn bolady», - dedi senator Olga Býlavkına.
«Shańyraq» basqarýshy kompanııasy« JShS Baıqaýshylar keńesiniń tóraǵasy, Qazaq ulttyq agrarlyq zertteý ýnıversıtetindegi Agroınnovatsııa jáne ekologııa ǵylymı-zertteý ınstıtýtynyń dırektory, «S.Seıfýllın atyndaǵy Qazaq agrotehnıkalyq ýnıversıteti« KEAQ Basqarma tóraǵasy-rektory jáne basqalar baıandama jasap, usynystaryn aıtty.
Senatorlar kóshpeli kezdesýdi qorytyndylaı kelip, osy shara barysynda aıtylǵan usynystar men máseleler dóńgelek ústel barysynda talqylanyp, usynym túrinde Úkimetke jiberiletinin atap ótti.