Senatorlar áýe kompanııalary qyzmetiniń sapasyn synǵa aldy
Senatorlar Qarjy jáne bıýdjet komıtetiniń otyrysynda jolaýshylardy el ishindegi áýe jolymen tasymaldaý salasyndaǵy máselelerdi talqylady. Komıtet hatshysy Sergeı Karplıýk bıylǵy 28 naýryzda 2023 jylǵa arnalǵan respýblıkalyq bıýdjetti naqtylaý aıasynda áleýmettik mańyzy bar tasymal shyǵystaryn sýbsıdııalaýǵa 800 mln teńge bólingenin atap ótti.
«Buǵan deıin «Áýe keńistigin paıdalaný jáne avıatsııa qyzmeti týraly» Zańdaǵy Jolaýshylardy tasymaldaý erejesine jolaýshylardyń quqyqtaryn qorǵaýdy kúsheıtýge baǵyttalǵan ózgerister men tolyqtyrýlar engizilgen bolatyn. Alaıda, qazirgi kezde kórsetiletin qyzmetterdiń sapasy áli de kóptegen suraq týǵyzyp otyr, onyń ishinde reıster baǵasynyń qymbattaýy men uzaq merzimge keshiktirilýi de bar», - dedi senator S. Karplıýk.
Depýtattar sonymen qatar, elimizdiń keıbir óńirlerinde áýe kóligi qyzmetterine qol jetkizýdiń qıyndyǵyn atap ótti. Bul, ásirese ishki týrızmniń qarqyndy damýyna, jańa oblystardyń qurylýyna jáne jańa baǵyttardyń ashylýyna qatysty bolyp otyr.
Salalyq mınıstrliktiń ókili senatorlar aıtqan pikir-usynystarmen kelise otyryp, reısterdiń keshigýi men toqtatylýyn qysqartý, sondaı-aq ushaq bıletteriniń qunyn tómendetý úshin otandyq áýe kompanııalarymen avıaparkterdi jáne ushaqtar syıymdylyǵyn ulǵaıtý jóninde belsendi jumys júrgizilip jatqanyn habarlady. Sondaı-aq, 2022-2023 jyldary qazaqstandyq jáne sheteldik áýe kompanııalaryna 25 mln teńgeden astam somaǵa 9 aıyppul salynǵany aıtyldy.
Senator Sergeı Karplıýk otyrysty qorytyndylaı kelip, azamattyq avıatsııa komıteti áýe kompanııalary usynatyn qyzmetterdiń sapasyna erekshe nazar aýdarýy, sondaı-aq jolaýshylardyń quqyqtaryn qorǵaý salasynda týyndaıtyn problemalarǵa jedel áreket etýi qajet ekenin atap ótti. Depýtat sondaı-aq, qajet bolǵan jaǵdaıda problemalardy sheshýge, onyń ishinde zańnamany jetildirý jolymen járdemdesýge Parlament Senaty daıyn ekenin jetkizdi.
Aıta ketsek, áýe kompanııasy «qara tizimdegilerdi» tasymaldamaýǵa quqyly, al jolaýshylar quqy qalaı kúsheıtildi?
2022 jyly 78,4 myń áýe reısiniń ishinen 5 myńnan astamy toqtatylǵan.
Air Astana-ǵa eki jylda 6,7 mlrd teńge aıyppul salyndy.
Al, Fly Arystan Air Astana-dan bólinip shyqqanda bılet arzandaýy múmkin.