Senatorlar Atyraý oblysyndaǵy apatty úılerdiń máselelerin talqylady

NUR-SULTAN. QazAqparat - Qazaqstan Respýblıkasy Parlamenti Senatynyń depýtattary Ǵumar Dúısembaev pen Saǵyndyq Luqpanov Atyraý oblysyna jumys sapary aıasynda Maqat aýdanynda kezdesýler ótkizip, jergilikti halyqtyń muń-muqtajyn tyńdady, dep habarlaıdy QazAqparat.

Senatorlar Dossor kentinde apatty jaǵdaıda turǵan úılerdiń turǵyndarymen kezdesip, máseleniń mán-jaıymen tanysty. Kent ákiminiń aıtýynsha, kentte 150-den astam eski jáne apatty jaǵdaıdaǵy úı bar. Dossor poselkesi qurylǵan 1911 jyly jumysshylarǵa arnap salynǵan úıler eń kóne úı bolyp otyr. Senator Ǵumar Dúısembaev bul máseleniń aldaǵy ýaqytta zań boıynsha sheshiletinin jetkizdi.

Senatorlar Maqat aýdanynyń ortalyǵyna arnaıy baryp, aýdandyq ortalyq aýrýhanasynyń dárigerlerimen kezdesti. Júzdesýde maman tapshylyǵyn joıý jáne dáriger mamandardy jergilikti jerge tartý týraly aıtyldy. Dárigerler sondaı-aq rezıdentýra bitirgen jas mamandardyń aýdanǵa kelmeıtini jaıynda aıta kelip, bolashaqta maqattyq mamandarǵa arnaıy kelisim-shartpen kvota bólinýge yqpal etýdi surady.