Senatorlar atom energııasyn paıdalaný máseleleri jónindegi túzetýlerdi qabyldady

NUR-SULTAN. QazAqparat – Energetıka mınıstri Nurlan Noǵaev senatorlardyń nazaryna «QR keıbir zańnamalyq aktilerge atom energııasyn paıdalaný máseleleri boıynsha ózgerister men tolyqtyrýlar engizý týraly» zań jobasyn usyndy, dep habarlaıdy QazAqparat tilshisi.

Mınıstrdiń aıtýynsha, zań jobasy qoldanystaǵy zańnamanyń quqyqtyq qaıshylyqtaryn joıýdy kózdeıdi. Sondaı-aq qujat keıbir normalardy atom energııasy jónindegi halyqaralyq agenttiktiń (AEHA) qaýipsizdik jónindegi halyqaralyq normalaryna sáıkes keltirýge baǵyttalǵan.

«Ol úshin «Atom energııasyn paıdalaný týraly» jáne «Halyqtyń radıatsııalyq qaýipsizdigi týraly» zańdarynyń normalarynyń termınologııasy men uǵymdyq apparatyn naqtylaý kózdeledi. Halyqtyń radıatsııalyq qaýipsizdigi salasyndaǵy memlekettik saıasatty sapaly iske asyrý, sondaı-aq ókilettikterdiń qaıtalanýyn boldyrmaý maqsatynda ýákiletti memlekettik organdardyń ókilettikteri men fýnktsııalaryn shekteý kerek. Bilimdi tekserýden ótý rásimderin yryqtandyrý maqsatynda atom energııasyn paıdalaný obektilerinde jumys isteıtin personalǵa attestattaýdan qaıta ótý quqyǵyn berý josparlanǵan», - dedi ol.

Sonymen qatar atalmysh zań arqyly ıadrolyq materıaldardy, radıoaktıvti zattardy jáne radıoaktıvti qaldyqtardy tasymaldaý kezinde ıadrolyq jáne radıatsııalyq avarııalarǵa avarııalyq ázirlikti jáne den qoıýdy reglamentteý kózdelgen.

Senatorlardyń talqylaýynan keıin zań jobasy qabyldandy.