Senatorlar Aral teńizindegi jaǵdaıǵa qatysty usynys jasady

NUR-SULTAN. QazAqparat – Sanat tóraǵasynyń orynbasary Asqar Shákirov bastaǵan bir top senatorlar joldaǵan depýtattyq saýalda Aral óńiriniń ekologııalyq máseleleri kóterildi. Senattyń jalpy otyrysynda bul máselege oraı Premer-Mınıstr Álıhan Smaıylovtyń atyna saýal joldandy, dep habarlaıdy QazAqparat tilshisi.

«Aral teńizi basseıninde turaqty turatyn adamdardyń aǵzasynda ómirlik mańyzy bar dene músheleriniń fýnktsıonaldyq jaı-kúıinde ózgerister anyqtalyp, tipti, patologııalyq aýrýlardyń damýyna deıingi ózgeriske ushyrap jatyr. Osylaısha, Araldyń qurǵaýy planetarlyq aýqymdaǵy ekologııalyq qasiret bolyp otyr. Ony barlyq elderdiń, halyqaralyq uıymdardyń kúsh-jigerin biriktirý arqyly ǵana toqtatýǵa bolady. Eń aldymen, osy ekologııalyq daǵdarysty sheshýge halyqaralyq qorlar men ǵylymı ortalyqtardy tartý qajet. Sońǵy ýaqytta olardyń aımaqtaǵy belsendiligi aıtarlyqtaı tómendep otyr», - dedi senator Aqylbek Kúrishbaev depýtattyq saýaldy oqı otyryp.

Senatorlar máseleni sheshý úshin kelesi sheshimderdi usyndy: Halyqaralyq Araldy qutqarý qorynyń jumysyn jandandyrý, Ortalyq Azııa elderimen sý-energetıkalyq konsortsıým qurý jáne qurǵap qalǵan teńizdiń túbine jasyl jelekterdi belsendirek otyrǵyzý.

«Aral teńiziniń qazaqstandyq bóligindegi tabıǵı ekpelerdi qosa alǵanda, ormannyń jalpy aýdany 337 myń gektardy qurady. Sonymen qatar, bizdiń ózbek áriptesterimiz shamamen 1,6 mln ga alqapqa sekseýil ekpelerin otyrǵyzdy. Munymen qosa, olar júıeli túrde aǵash daqyldarynyń shóldi jaǵdaılaryna beıimdelgen túrlerin keńeıtýmen aınalysýda. Osyǵan baılanysty bizge aǵash otyrǵyzý jumystarynyń qarqynyn jedeldetip qana qoımaı, fıtomelıoratıvtik tehnologııalardy da jetildirý kerek», - dep atap ótti A. Kúrishbaev.

Depýtattardyń aıtýynsha, olar qazirdiń ózinde óz ókilettikteri aıasynda bul baǵytta belsendi jumys istep jatyr. Senatorlar taıaýda ǵana Soltústik Aral sýyn ustap turǵan Kókaral bógetin jóndeý qajettiligi týraly Úkimetke saýal joldaǵanyn eske saldy. Parlamentaralyq dıplomatııany odan ári damytý aıasynda olar dúnıejúzilik qoǵamdastyqtyń nazaryn Aral problemasyna aýdarý maqsatynda túrli halyqaralyq platformalarda osy máselelerdi kóterýdi kózdep otyr.