Senatorlar Aqmola oblysynda boldy

KÓKShETAÝ. QazAqparat - Memleket basshysynyń «Qazaqstandyqtardyń ál-aýqatynyń ósýi: tabys pen turmys sapasyn arttyrý» Joldaýyndaǵymindetterdi túsindirý maqsatynda QR Parlamenti Senatynyń Áleýmettik-mádenı damý jáne ǵylym komıtetiniń músheleri jumys saparymen Aqmola oblysyna keldi, dep habarlaıdy QazAqparat tilshisi.

Senatorlardyń Aqkól aýdanynyń aktıvimen ótken kezdesýine aımaq basshysy Málik Myrzalın qatysty. Delegatsııa quramynda depýtattar Birǵanym Áıtimova, Serik Bekturǵanov, Baqytjan Jumaǵulov, Dınar Núketaeva jáne Murat Baqtııarov bar.

Kezdesýde komıtet tóraıymy Birǵanym Áıtimova jıynǵa kelgen oblystyq jáne jergilikti atqarýshy organdardyń basshylaryna, óńirlik jáne aýdandyq máslıhat depýtattaryna, jurtshylyq ókilderine jumysshy tobynyń atynan alǵysyn bildirip, Joldaýdyń mereıli mindetterin júzege asyrýdaǵy bastamashyldyq qyzmetterine tabys tiledi.

«Elbasynyń Joldaýy qyrýar eńbekpen, mańdaı termen kelgen jetistikterimizdiń jalǵasyn kórsetedi. Joldaýda: «Bizdiń strategııalyq maqsatymyz - 2050 jylǵa qaraı álemdegi ozyq 30 eldiń qataryna qosylý» degen jolbastar sózder jaı aıtylǵan joq. Buǵan biz jetemiz. Halqymyzdyń qaıyspas rýhy osyny meńzeıdi. Qýatty memlekettiń qýatty halqy da bolýy kerek. Qazaqstan Respýblıkasy Prezıdentiniń kezekti Joldaýy osy ulyq sózdi aıtyp otyr, buǵan berik negiz baryn kórsetti», - dedi Birǵanym Áıtimova.
 

Senat komıtetiniń tóraıymy Joldaýda aldaǵy ýaqytta eń tómengi eńbekaqynyń 1,5 ese ósetindigin, bilim berý men densaýlyq saqtaý qyzmetiniń sapasy artatyndyǵyn, ómir sapasynyń  jaqsaratyndyǵyn túsindirdi.

Komıtet hatshysy Serik Bekturǵanov pen músheleri Baqytjan Jumaǵulov, Murat Baqtııaruly, Dınar Núketaeva Joldaýdyń jyldaǵydan erte jasalýy ondaǵy mindetterdi oryndaýǵa negiz bolatyn bıýdjetti qalyptastyrý úrdisine baılanysty ekendigin jáne onyń qaıtarymy baqylaýda bolatyndyǵyn atap ótti. Sondaı-aq qazir el turǵyndarynyń 72,5 paıyzynyń ómir jaǵdaıy jaqsarǵandyǵyn, «Pedagogtar mártebesi týraly zańnyń» mańyzdylyǵyn, Jastar jylyn jarııalaýdyń mánin, agroónerkásiptegi koopertıvtik qozǵalys pen qaıta óńdeý salasyn, jalpy básekelestik mazmunyn, ómir sapasyn artyrýǵa baǵyttalǵan baǵdaramalardyń qajettiligin aıtty.
      

Sapar aıasynda senatorlar Aqkól jáne Bulandy aýdandarynda bolyp, eńbek ujymdarymen kezdesti.