Senatorlar adam quqyǵy negizderin bastaýysh synyptan oqytýdy usyndy

NUR-SULTAN. QazAqparat - Senat tóraǵasynyń orynbasary Asqar Shákirov pen senator Nurtóre Júsip Premer-Mınıstr Asqar Mamınniń atyna depýtattyq saýal joldady. Olardyń aıtýynsha, azamattardyń óz quqyqtaryn qorǵaý máselelerin tolyq bilmeýi quqyqtyq tetikterdi qoldanýǵa múmkindik bermeıdi, dep habarlaıdy QazAqparat tilshisi.

«Jyl saıyn balalarǵa qatysty qylmys sany kóbeıip otyr. Bas prokýratýranyń málimetine súıensek, bıyl elimizde mundaı jaǵdaı 8 paıyzǵa ósken. Oǵan kámeletke tolmaǵandarǵa qatysty seksýaldyq sıpattaǵy faktilerdi jasyrǵany úshin qylmystyq jaýapkershiliktiń engizilýi de sebep boldy. Jalpy, 70 paıyzdan astam jaǵdaıda kámeletke tolmaǵandarǵa qatysty qylmystardy jaqyn, týys adamdar jasaıtyny alańdatady», – delingen senatorlardyń depýtattyq saýalynda.

Soǵan sáıkes olar adam quqyqtarynyń negizderin jalpy bilim beretin mektep baǵdarlamasyna mindetti pán retinde engizýdi usyndy.

«Qazir joǵary synyptarda «Adam. Qoǵam. Quqyq» páni oqytylady. Onyń mazmuny adam quqyqtary men bostandyqtarynyń máni, olardy qorǵaý tásilderine emes, adam tabıǵaty týraly jalpy paıymdaýlar tóńireginde ǵana júredi. Qoǵamdaǵy ahýaldy eskerip, atalǵan pándi bastaýysh synyptardan bastap oqytqan jón dep esepteımiz», – dedi Nurtóre Júsip.