Senatorlar 22 maýsym kúni ótetin palata otyrysynyń kún tártibin bekitti

ASTANA. QazAqparat - Senat Spıkeri Máýlen Áshimbaevtyń tóraǵalyǵymen Palata Bıýrosynyń otyrysy ótti. Onda depýtattar 22 maýsym kúni bolatyn Senat otyrysynyń kún tártibin bekitti, dep habarlaıdy QazAqparat.

Soǵan sáıkes aldaǵy beısenbide senatorlar «Qazaqstan Respýblıkasynyń keıbir zańnamalyq aktilerine jol júrisin uıymdastyrý máseleleri boıynsha ózgerister men tolyqtyrýlar engizý týraly» zańdy qaraıdy. Osy qujattyń normalary arqyly skýter júrgizýshileriniń quqyqtary men mindetteri belgilenedi. Sondaı-aq atalǵan kólik quraldaryn memlekettik tirkeý týraly kýálikterdi daıyndaý salasynda memlekettik monopolııany engizý kózdelgen.

Sonymen qatar Palata otyrysynda «Qazaqstan Respýblıkasynyń keıbir zańnamalyq aktilerine suıytylǵan gaz aınalymyn retteý jáne turǵyn úı-kommýnaldyq sharýashylyq máseleleri boıynsha ózgerister men tolyqtyrýlar engizý týraly» zań qaralady. Bul zań suıytylǵan gazdy taratý júıesiniń ashyqtyǵyn qamtamasyz etýge arnalǵan.

Bıýro otyrysynda Senat Tóraǵasy Memleket basshysynyń tapsyrmalaryn oryndaýǵa arnalǵan birqatar mańyzdy zańnyń sessııa sońyna deıin qabyldanýy kerek ekenin aıtty. Olardyń qatarynda zańsyz alynǵan aktıvterdi qaıtarý, kásibı biliktilik jáne onlaın-platformalar máselelerine qatysty zańdar bar.

Odan bólek kelesi sessııaǵa daıyndyq jumystarynyń mańyzdylyǵy týraly da sóz boldy. Osyǵan oraı Máýlen Áshimbaev senatorlardy tıisti jumystardy ýaqtyly atqarýǵa shaqyrdy jáne Palatanyń aldaǵy sessııaǵa arnalǵan jumys josparyna usynystar berýdi tapsyrdy.

Bıýro otyrysynda Májilisten kelip túsken zańdar jumys úshin Senattyń Komıtetterine bólinip berildi.