Senatorlar 2023-2025 jyldarǵa arnalǵan respýblıkalyq bıýdjetti qaraıdy

ASTANA. QazAqparat - Senat spıkeri Máýlen Áshimbaevtyń tóraǵalyǵymen palata bıýrosynyń otyrysy ótti. Onda bıýro músheleri 10 qarashada ótetin Senat otyrysynyń kún tártibin talqylady, dep habarlaıdy QazAqparat.

Palata otyrysynda senatorlar aldaǵy úsh jylǵa arnalǵan respýblıkalyq bıýdjetke qatysty zań jobalaryn qaraıdy. Bul qujattar 2023-2025 jyldar aralyǵynda sýbventsııalar men alý kólemin bekitýdi de kózdeıdi.

«Respýblıkalyq jáne oblystyq bıýdjetter, respýblıkalyq mańyzy bar qalalar, astana bıýdjetteri arasyndaǵy 2023-2025 jyldarǵa arnalǵan jalpy sıpattaǵy transfertterdiń kólemi týraly» zań jobasynyń normalary ekonomıkalyq áleýeti ártúrli óńirlerdiń qarjylyq múmkindikteri arasyndaǵy teńsizdikti joıýǵa, sondaı-aq qazaqstandyqtardyń memleket kepildik bergen qyzmetterdiń teń deńgeıine qol jetkizýin qamtamasyz etýge baǵyttalǵan.

«Qazaqstan Respýblıkasynyń Ulttyq qorynan 2023-2025 jyldarǵa arnalǵan kepildendirilgen transfert týraly» zań jobasynda Ulttyq qordan respýblıkalyq bıýdjetke kepildendirilgen transferttiń mólsheri aıqyndalady: 2023 jylǵa – 2 200 mlrd teńge, 2024 jylǵa – 2 000 mlrd teńge, 2025 jylǵa – 1 900 mlrd teńge. Osy zańdy qabyldaý bıýdjet pen Ulttyq qordyń teńgerimdiligin qamtamasyz etýge múmkindik beredi.

Kelesi «2023-2025 jyldarǵa arnalǵan respýblıkalyq bıýdjet týraly» zań jobasy aǵymdaǵy jaǵdaılarǵa beıimdele otyryp, ekonomıkalyq model qurý arqyly azamattardyń ál-aýqatyn jaqsartýǵa, sondaı-aq makroekonomıkalyq turaqtylyqty saqtaý jáne halyqtyń tabysyn arttyrý úshin jaǵdaılar jasaýǵa arnalǵan. Bıýdjettiń shyǵys bóliginiń jobasynda memlekettik organdardyń saıasatyndaǵy jekelegen baǵyttardyń ózgeristeri, Memleket basshysynyń Joldaýlaryna, zańnamalyq aktilerge, sondaı-aq 2021 jylǵy bıýdjettiń atqarylý qorytyndylaryna sáıkes jańa mindettemeler boıynsha tolyqtyrýlar eskerilgenin atap ótken jón.