Senatorlar 2020 jyldyń bıýdjeti boıynsha Úkimettiń esebin talqylaıdy
«Palata tóraǵasy Máýlen Áshimbaevtyń tóraǵalyq etýimen Bıýro otyrysy bolyp, onda depýtattar Senattyń 2021 jylǵy 17 maýsymǵa josparlanǵan otyrysynyń kún tártibin bekitti. Qazaqstan Respýblıkasynyń Úkimeti men Respýblıkalyq bıýdjettiń atqarylýyn baqylaý jónindegi esep komıtetiniń «2020 jylǵa arnalǵan respýblıkalyq bıýdjettiń atqarylýy týraly» esebi týraly másele kezekti otyrystyń kún tártibine engizildi», - delingen Senat baspasóz qyzmetiniń málimetinde.
Senatorlar Palatanyń aldaǵy otyrysynda «Memlekettik feldegerlik baılanys týraly» zań jobasyn ilespe túzetýlerimen qaraıtyn bolady.
Qujat feldegerlik baılanystyń mindetteri men qaǵıdattaryn zańnamalyq turǵyda bekitýge, memlekettik feldegerlik qyzmet salasyndaǵy qyzmetkerlerdiń quqyqtary men mindetterin aıqyndaýǵa, olardyń quqyqtyq jaǵdaıyn retteýge, sondaı-aq áleýmettik kepildikter belgileýge baǵyttalǵan. Zań jobasyn qabyldaý qyzmettiń quqyqtyq, uıymdastyrýshylyq negizderin jáne qyzmetkerlerdiń memlekettik organdarymen ózara jedel is-qımyl tártibin aıqyndaıdy.
Bıýro otyrysy barysynda Májilisten kelip túsken zań jobalary Senattyń turaqty komıtetterine bólinip berildi.