Senatorǵa Soltústik Qazaqstan oblysyndaǵy aýyldar jaǵdaıy týraly aıtyldy
11:22, 15 Qańtar 2020
PETROPAVL. QazAqparat - Soltústik Qazaqstan oblysynda jumys babyndaǵy saparmen júrgen senator Erik Sultanov Aqjar aýdanynyń Talshyq aýylynda bolyp, aýdandyq máslıhat depýtattarymen kezdesti, dep habarlaıdy QazAqparat.
Senat baspasóz qyzmetiniń málimetinshe, depýtat jınalǵandarǵa zańnamadaǵy ózgerister, atap aıtqanda «Pedagog mártebesi týraly» zań men qylmystyq jáne ákimshilik kodeksterge engizilgen túzetýler, ataýly áleýmettik kómek tólemderi týraly habardar etti.
E.Sultanov búgingi tańda Soltústik Qazaqstandy gazdandyrýǵa daıyndyq jumystary júrgizilip jatqanyn atap ótti.
Máslıhat depýtattary aýdan problemalaryn, onyń ishinde birqatar eldi mekenderdi uıaly baılanyspen qamtyp, ınternet ornatý qajettigin atap ótti. Bul másele boıynsha depýtattyq saýal jiberiletin bolady.
Senator sapar barysynda «Besterek» shaǵyn aýdanyndaǵy 500 adamǵa arnalǵan qazirgi zamanǵy dene shynyqtyrý-saýyqtyrý kesheninde boldy.