Senator Jórgenbaev: ulttyq joba aıasynda mektep salý monopolııalanbaýy kerek

ASTANA. QazAqparat - «Jaıly mektep» ulttyq jobasy boıynsha qurylys jáne jobalaý jumystarynda problemalar barshylyq. Bul týraly depýtat Janbolat Jórgenbaev búgingi Senattyń jalpy otyrysynda másele kóterdi, dep habarlaıdy QazAqparat tilshisi.

Depýtat ulttyq jobaǵa sáıkes 2025 jyldyń sońyna deıin búkil el boıynsha 2,6 trln teńgege 401 jańa mektep salý josparlanyp otyrǵanyn eske saldy. Bul rette konkýrsqa qatysyp jatqan jergilikti orta kásipkerlik ókilderi olardyń atyna negizsiz shaǵymdar aıtylatynyn, al tenderlik qujattardaǵy talaptar tek iri bızneske baǵyttalǵanyn aıtqan.

«Talaptarǵa sáıkes, konkýrstyq komıssııa áleýetti jetkizýshige keıingi 5 jyl ishinde jyl saıyn keminde 500 mln teńge salyq tólegenderge shartty jeńildik beredi. Bul rette, el aýmaǵynda tıisti talapqa tek 4-5 uıym ǵana saı kelip tur. Sondyqtan, atalǵan talaptar belgili bir zańdy tulǵalardyń paıdasyna «Jaıly mektep» ulttyq jobasyn júzege asyrýdy monopolııalaýǵa, sondaı-aq jobaǵa qatysqysy keletin basqa da uıymdardy sebep bolyp otyr», - dedi depýtat.

Jórgenbaevtyń aıtýynsha, is júzinde iri «jeńimpaz kompanııalardyń» basym kópshiligi negizgi jumys kólemin oryndaý úshin qosalqy merdigerlik jumystarǵa áldeqaıda az somaǵa shaǵyn jáne orta bıznes ókilderin tartady. Jumys sapasynyń tómendigi jáne qurylys merzimderiniń buzylý qaýpi sonyń nátıjesinde oryn alady.

«Úkimetten «Jaıly mektep» ulttyq jobasy baǵytyndaǵy qurylys-jobalaý jumystary aıasynda monopolııalanýyna jol bermeýdi, orta bıznes úshin satyp alýlardaǵy bar kedergilerdi joıýdy, bıýdjet qarjysy esebinen oryndalatyn qyzmetter men jumystar boıynsha «bas merdiger» men «qosalqy merdigerdiń» mindettemesi men jaýapkershiligin belgileýdi suraımyn», - dedi senator.