Senator Jetisý oblysynyń sý sharýashylyǵy salasyndaǵy problemany aıtty

ASTANA. QazAqparat - Senator Ǵalıasqar Sarybaev elimizdiń Premer-Mınıstri Álıhan Smaıylovtyń atyna joldaǵan depýtattyq saýalynda Jetisý oblysynyń sý sharýashylyǵy salasyndaǵy problemalar týraly aıtty, dep habarlaıdy QazAqparat tilshisi.

Depýtattyń sózine qaraǵanda, qazirgi ýaqytta «Qazsýshar» respýblıkalyq memlekettik kásipornynyń Almaty fılıalynyń esebinde 9 sý qoımasy, 15 sý toraby men bóget, sondaı-aq 5000 shaqyrymnan astam magıstraldyq, taratý arnalary men kollektorlyq-drenaj jelisi bar. Onyń ishinde 3 nysan apatty jaǵdaıda tur.

«Jetisý oblysynyń Eskeldi aýdanyndaǵy Qaratal ózenindegi sý tartý bógeti 1976 jyly paıdalanýǵa berilgen. Sol ýaqyttan beri bul nysanǵa kúrdeli jóndeý jumystary múldem júrgizilmegen. Tehnıkalyq jaǵdaıy nashar», - dedi senator.

Ǵalıasqar Sarybaevtyń aıtýynsha, «Aqeshki» jáne «Tentek» sý nysandaryndaǵy jaǵdaı da osyǵan uqsas.

Depýtat bul saladaǵy tehnıkalyq problemalarmen qatar, kadrlyq máselelerge de nazar aýdardy. Kanalǵa qyzmet kórsetý úshin normatıv boıynsha kadrlar sany 970 bolýy kerek. Al is júzinde qazir 293 adam jumys istep keledi.

«Biryńǵaı tarıfpen qarjylandyrylatyn obektilerindegi sý berýdi retteýshilerdiń ortasha jalaqysy 85 870 teńgeni qurap otyr. Jumys aılarynyń uzaqtyǵy jylyna 4-8 aıdy quraıdy, ıaǵnı kadrlar tapshylyǵy baıqalyp jatyr. Al birdeı jumysty oryndaǵan kezde respýblıkalyq bıýdjetten qarjylanatyn sý obektisinde retteýshilerdiń jalaqysy 141 931 teńgeni qurady. Sý sharýashylyǵynyń strategııalyq obektilerin qarjylandyrý erekshelikteri áleýmettik teńsizdikke ákeledi, óndiristik ýchaskelerdiń qyzmetkerleri eńbek jaǵdaıyndaǵy jáne jalaqydaǵy aıyrmashylyqqa narazy», - dep atap ótti senator.

Ǵalıasqar Sarybaev sózin qorytyndylaı kelip, Úkimet basshysyna saladaǵy máselelerdi sheshýdi surady.