Senator jastar arasyndaǵy bedeýliktiń sebepterin aıtty
Senatordyń aıtýynsha, Qazaqstanda 15 pen 24 jas aralyǵyndaǵy jasóspirimder men jastardyń úlesi kem degende 20 paıyzdy quraıdy. Sonymen birge, demografııalyq boljamdar boıynsha, 2025 jylǵa qaraı osy jas tobyndaǵy halyqtyń úlesi ósedi dep kútilýde. Alaıda senator sońǵy 3 jylda osy áleýmettik top ishinde jańa AITV -ınfektsııalarynyń (VICh) ósýi 43 paıyz bolǵanyn atap ótti.
«Áleýmettik zertteýler kórsetkendeı, jasóspirimderdiń tek 9 paıyzynyń aýrýdyń berilý joldary týraly jan-jaqty bilimi bar, 60 paıyzy jynystyq jolmen beriletin ınfektsııalardyń aldyn alý ádisteri týraly bilmeıdi, al naýqas jastardyń 62,6 paıyzy óz betimen emdelgen. Bul qalyptasqan ádettiń eń kóp taralatyn saldary - bedeýlik», - dedi Aqmaral Álnazarova Úkimet basshysynyń atyna joldaǵan depýtattyq saýalynda.
Senat depýtaty Qazaqstanda jastardyń 128 densaýlyq ortalyǵy jumys isteıtinin jetkizdi. Biraq olar ýchaskelik emhana bólimsheleri túrinde ǵana jumys istep tur. Bul ortalyqtardyń damýyna kedergi bolatyndyǵyn kórsetedi.
«Sizden halyqaralyq standarttar negizinde jastarǵa qyzmet kórsetý boıynsha servıstiń odan ári jetildirilýi men qol jetimdiligi úshin jaǵdaı jasaýdy, barlyq oblystar men respýblıkalyq mańyzy bar qalalarda zańdy derbes jastar densaýlyq ortalyqtaryn qurýdy qarastyrýdy suraımyz. Bul tolyq jáne sapaly medıtsınalyq kómek kórsetý, jastar arasynda sanıtarlyq-aǵartýshylyq jumystardy uıymdastyrý, tıisti kólemde qarajat bólý úshin kerek», - dedi Aqmaral Álnazarova.