Senator jabdyqtary tozǵan medıtsınalyq uıymdardyń máselesin kóterdi

ASTANA. QazAqparat – Senator Aqmaral Álnazarova Almatydaǵy Akýsherlik, gınekologııa jáne perınatologııa ǵylymı ortalyǵynyń máselesin kóterip, Úkimet basshysy Álıhan Smaıylovtyń atyna saýal joldady, dep habarlaıdy QazAqparat tilshisi.

«Ortalyqtaǵy negizgi qural-jabdyqtyń tozýy 71 paıyzdy qurap otyr. Máselen, sáýleli jylýy bar 18 ústeldiń tek 5-eýi jumys isteıdi, 18 kıývezdiń tek 8-i jaramdy. 2008 jyly satyp alynǵan laparoskopııalyq tirekter tozǵan. Ýltradybystyq apparat pen defıbrıllıatorlar jetkiliksiz, fýnktsıonaldyq kerýetter ýaqyt talabyna saı emes. Bul ortalyqtyń uıymdyq-quqyqtyq nysanyn 2018 jyly aktsıonerlik qoǵamǵa ózgertýdiń nátıjesi bolyp otyr. Osyǵan baılanysty ortalyq memlekettik qarjylandyrý, qajet medıtsınalyq qural-jabdyqtar alý men olardy jańartý, qyzmetkerlerin memleket qarajat esebinen oqytý múmkindiginen aıyryldy», - dedi A. Álnazarova.

Senator máseleniń kezek kúttirmeıtinin eskere otyryp, Úkimet rezervinen ortalyqqa shuǵyl tártipte qosymsha qarajat bólýdi surady.

Depýtattyń aıtýynsha, mundaı jaǵdaı Qazaq ulttyq medıtsına ýnıversıtetine qarasty medıtsınalyq uıymdarda, Pedıatrııa jáne balalar hırýrgııasy ınstıtýtyna, A.N.Syzǵanov atyndaǵy ulttyq ǵylymı hırýrgııa ortalyǵynda, Kardıologııa jáne ishki aýrýlar, Qazaq onkologııa jáne radıologııa ǵylymı-zertteý ınstıtýttarynda da qalyptasqan. Bul medıtsınalyq uıymdardaǵy jabdyqtar 30-dan 85%-ǵa deıin tozǵan.

«Densaýlyq saqtaý jáne Qarjy mınıstrlikterine, joǵaryda atalǵan ǵylymı ortalyqtar men ınstıtýttardyń ınfraqurylymdaryn jańartý jáne olardy óz deńgeıinde qarjylandyrý máselelerin sheshýge baǵyttalǵan keshendi is- sharalar josparyn birigip qabyldaýdy tapsyrýyńyzdy suraımyn», - dedi senator.