Senator vandalızm úshin jaýapkershilikti kúsheıtýdi usyndy

<p>ASTANA. KAZINFORM &ndash; Senator Andreı Lýkın óziniń depýtattyq saýalynda elimizdegi vandalızmniń jıilep ketkeni týraly másele kóterdi. Depýtat 2023 jyly bes myńnan astam turǵyn abattandyrý erejesin buzǵany týraly derekti jarııa etti.</p>

Onyń aıtýynsha, tártip buzǵandar jasyl jelek pen aǵashtardy joıyp jiberdi, aıaldamalar men lıftterdi buzdy, basqa da ınfraqurylymdyq jáne kóshedegi sándik nysandardy qıratty.

«Bir kezderi Mańǵystaý oblysyndaǵy Ybyqty saı shatqalynda adam esimin balǵa-qashaýmen oıyp jazǵan mádenıet salasy sheneýniginiń áreketi jurtshylyq arasynda rezonans týǵyzǵan bolatyn. Sonda ol adamdardy osyndaı áreketke kim ıtermeledi? Árıne, buzaqylardyń áreketi zań boıynsha qýdalanady jáne tártip buzǵandarǵa aıyppul salynýy da, qamaýǵa alynýy da múmkin. Tıisti zańnamalyq túzetýler byltyrdyń basynda qabyldandy. Degenmen, tájirıbe kórsetip otyrǵandaı, qoldanystaǵy sharalar jetkiliksiz», - dedi senator Úkimet basshysy Álıhan Smaıylovtyń atyna joldaǵan saýalynda. 

Andreı Lýkın Parlament depýtattary vandalızm kórinisteri úshin jaýapkershilikti odan ári kúsheıtý máselesin pysyqtap jatqanyn, sondaı-aq Úkimetke onymen kúresý tetikterin usynǵanyn habarlady.

«Vandalızm úshin jaýapkershilikti kúsheıtýdi jáne zańnamaǵa tıisti ózgerister engizýdi usynamyn. Sonymen birge, qazirgi kezde vandalızmge qarsy kúres negizinen quqyqtyq salada jazalaý arqyly júzege asyrylady. Sondyqtan halyqaralyq oń tájirıbeni paıdalaný múmkindigin qarastyrý jáne vandalızmniń aldyn alýda kreatıvti ındýstrııa ókilderiniń qatysýyn pysyqtaý mańyzdy. Olar óz ónimderi arqyly zańsyz árekettiń aldyn alýǵa, jastardyń mádenıetin kóterýge yqpal etedi, ıaǵnı mundaı áreketterdiń zańsyzdyǵyn tıimdi tásildermen túsindire alady», - dedi depýtat.

Eske salsaq, byltyr Mańǵystaýdaǵy Ybyqty saıyna qashap jazý jazyp, keıin keshirim suraǵan Aqtóbe qalalyq zaǵıptar úıiniń dırektory Manat Kósherbaev óz erkimen jumystan ketti.