Senator ulttyq qundylyqtardy ilgeriletýge qarajat bólýdi surady

<p>Úkimet senatorlardyń ulttyq qundylyqtardy ilgeriletýge baǵyttalǵan usynymdaryn elemeı keledi. Bul týraly Senattyń jalpy otyrysynda depýtat Nurtóre Júsip aıtty, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

Depýtat ulttyq qundylyqtardy ilgeriletý jóninde Senatta aıtarlyqtaı jumys júrgizilip jatqanyn atap ótti. Osy maqsatta Senatta keıingi eki jylda 2 parlamenttik tyńdaý, 3 dóńgelek ústel, 3 kezdesý, 3 komıtettiń keńeıtilgen otyrysy ótkizildi. Sonymen qatar, dástúrli mádenıetke, tól tarıhymyzǵa, otbasy ınstıtýtyn nyǵaıtýǵa, buqaralyq aqparat quraldaryndaǵy ıdeologııalyq aǵartýshylyqty kúsheıtýge qatysty 10 depýtattyq saýal joldandy.

«Alaıda, Úkimet Senattyń usynymdaryna tek biryńǵaı syrǵytpa jaýap berip keledi. Berilgen usynymdar eskerile bermeıdi. Sonda biz bul máselelerdi qashanǵy sóz ete beremiz? Máselen, «Internet jelilerde jáne elimizdegi buqaralyq aqparat quraldarynda ulttyq rýhanııatqa jat, teris qundylyqtardy dáripteıtin aqparattarǵa turaqty túrde taldamalyq sholý jasap, Ulttyq baıandama ázirleý jáne ony memlekettik basqarý ınstıtýttaryna joldaý» jónindegi usynym nazardan múldem tys qaldy», - dedi N. Júsip Úkimet basshysy Álıhan Smaıylovtyń atyna joldaǵan saýalynda.

Depýtat jaqynda Senatta «Ulttyq múdde» dıalog alańynyń kezekti otyrysy ótkenin, onda da osy máseleler jan-jaqty talqylanǵanyn eske saldy.

Onyń paıymynsha, «Qazaqstan halqyna» qory men memleketke qaıtarylatyn aktıvterden túsken qarjy áleýmettik jobalardy ǵana emes, ulttyq qundylyqtardy ilgeriletýge baǵyttalǵan jobalardy da qarjylandyrýy tıis.

Depýtat sóziniń sońynda Senattyń joǵaryda kórsetilgen usynymdarynyń iske asýyn jan-jaqty taldaý úshin Úkimet basshysynan Palatanyń otyrysyna jaýapty vıtse-premerdi jiberýdi surady.