Senator Úkimettiń bıýdjetti josparlaýdaǵy kemshiligin atady
«Úkimettiń jáne Esep komıtetiniń 2017 jyl boıynsha esepterin qoldaı otyryp, Úkimettiń nazaryn osy kezge deıin sheshimin tappaı kele jatqan tómendegi máselelerge aýdarǵym keledi. Bıýdjettiń atqarylý kórsetkishterin jaqsartý maqsatynda qarjy jylynyń sońynda bıýdjetti naqtylaý, oryn alǵan problemany sheshýdiń joly emes. Dúnıejúzilik ozyq tájirıbege súıensek, bıýdjettik josparlaý tıisti makroekonomıkalyq jaǵdaıdy qurýǵa yqpal etý, alǵa qoıylǵan perspektıva men qolda bar resýrstardy túgendeý úshin eldiń áleýmettik-ekonomıkalyq damýynyń naqty maqsatyn tujyrymdaýdan bastalýy tıis», - dedi depýtat.
Onyń aıtýynsha, bizdiń memlekette de bıýdjetti osylaı josparlaýdyń tolyq negizi qalanǵan. Makroekonomıkalyq jaǵdaı, uzaqmerzimdi bıýdjet jáne osylardy qamtamasyz etetin ulttyq-quqyqtyq normatıvtik bazalar bolyp qalyptasqan.
«Al osyǵan qaramastan Úkimet el damýynyń áleýmettik-ekonomıkalyq boljamynyń ózgerýi sebepti bir jyldyń ishinde respýblıkalyq bıýdjet parametrlerin úsh ret naqtylaýǵa usynady. Munyń syrtynda Úkimet óz quzyretinde bir jyldyń ishinde bıýdjetke 20-dan astam túzetý engizý tájirıbesin qoldanyp júr. Qorytyndysynda respýblıkalyq bıýdjet ári kiris ári shyǵys bólikteri boıynsha basqa parametrlermen atqarylady. Osynyń nátıjesinde bizde kiris bóligi qysqarý jaǵyna qaraı aýytqýmen, al shyǵys bóligi eleýli ıgerilmegen qarajat qaldyqtarymen atqarylýy zańdylyqqa aınaldy», dedi senator.
Demek, Murat Baqtııarulynyń paıymynsha, respýblıkalyq bıýdjet júıesiniń barynsha ortalyqtandyrylýy, nysanaly transfertterdiń kóptigi, olardy josparlaýdyń kúrdeliligi, bólingen qarjynyń túpki paıdalanýshyǵa jetkizý tetikteriniń jetilmeýi, baǵdarlama ákishilikteri men jergilikti atqarýshy organdar arasyndaǵy jaýapkershiliktiń jetispeýshiligi, aımaqtardyń sheshim qabyldaýdaǵy derbestiginiń tómendigi bıýdjet qarajatyn tıimdi paıdalanýda keri áserin tıgizýde.
«Salynǵan qarjy halyqtyń ıgiligine jumys istep, tıimdi paıdalanylyp jatyr ma? Bıýdjettik shyǵystardyń qandaı qaıtarymy bar? Bólingen qarjy azamattardyń ómir súrý sapasyn jaqsarta aldy ma? Biz muny jetkilikti bilmeımiz. Óıtkeni, biz kútkendeı nátıje az. Sapa baǵasyn jáne bıýdjet qarajatyn paıdalaný tıimdiliginiń ádistemesi men ólshemi áli jasalmaǵan. Bıýdjettik boljaý tsıfrlarmen kórsetilgen memlekettiń saıasaty. Sondyqtan da josparlaý sapasyn arttyrý jáne basqarý máseleleri birinshi kezekte sheshilýi kerek», - dedi ol.