Senator tótenshe jaǵdaı organdaryn qarjylandyrý kólemin arttyrýdy surady

NUR-SULTAN. QazAqparat – Senator Sergeı Ershov Premer-Mınıstr Asqar Mamınniń atyna joldaǵan depýtattyq saýalynda azamattyq qorǵaý máselelerine qatysty ózekti máselelerdi qozǵady, dep habarlaıdy QazAqparat tilshisi.

Onyń aıtýynsha, tabıǵı jáne tehnogendik sıpattaǵy tótenshe jaǵdaılar, onyń ishinde bógettiń jarylýy jáne eldi mekenderdi sý basý, Rıdderdegi órt, sondaı-aq Almaty men Óskemen mańyndaǵy qoqys polıgonynda bolyp jatqan oqıǵalardy taldaý ekonomıkalyq, áleýmettik, demografııalyq jáne ózge de memleket múddesiniń qozǵalatynyn kórsetedi.

«Tótenshe jaǵdaı organdary materıaldyq-tehnıkalyq turǵyda jabdyqtaý isinde qarjy jetkiliksiz bólinip keledi jáne qoldanystaǵy normatıvterdiń 58%-dan sál ǵana asatyn deńgeıdi qurap otyr. Halyqty jáne elimizdiń qaýipsizdigin qorǵaý úshin áleýmettik nysandar qurylysyna jumsalatyn shyǵyndar da qysqarýda», - dedi Sergeı Ershov Senattyń jalpy otyrysynda.

Senator osyǵan baılanysty 2022 jylǵa arnalǵan bıýdjetti qalyptastyrý kezinde azamattyq qorǵaý organdaryn tıisti materıaldyq-tehnıkalyq jaraqtandyrýǵa baǵyttalǵan qarjylandyrýdy qarastyrý qajet ekenin jetkizdi.

Sonymen qatar, depýtat TJ organdarynyń qyzmetkerlerin turǵyn úımen qamtamasyz etýge qatysty problemalardy, sondaı-aq «Azamattyq qorǵaý týraly» Zańdy jetildirý máselelerin de aıtty.