Senator teńizdegi jedel-qutqarý qyzmetin qurýdy usyndy

NUR-SULTAN. QazAqparat – Parlament Senatynyń jalpy otyrysynda depýtat Súıindik Aldashev teńizdegi jedel-qutqarý qyzmetin qurýdy usyndy. Osy oraıda Premer-Mınıstrdiń atyna osyndaı depýtattyq saýal joldady, dep habarlaıdy QazAqparat tilshisi.

Onyń aıtýynsha, ótken jyly Kaspıı teńiziniń qazaqstandyq sektorynda 15 mln tonna munaı óndirildi, onyń 2,2 mln tonnasy Aqtaý porty arqyly tasymaldandy. Odan basqa, 2020 jyly kemeler Aqtaý jáne Quryq teńiz porttaryna 1 283 ret kirgen, al 2025 jylǵa deıin bul kórsetkish 2 ese artady degen jospar bar.

Senatordyń pikirinshe, munyń bári Kaspıı teńiziniń lastaný qaýpin arttyrady jáne qazir belsendi sharalar qabyldaý asa mańyzdy. Osyndaı sharalardyń biri teńizdegi jedel-qutqarý qyzmetin qurý bolýǵa tıis.

«Kaspıı teńiziniń lastanýynyń negizgi qateri óndirý jáne tasymaldaý kezinde munaı jáne munaı ónimderiniń tógilýi bolyp sanalady. Sondyqtan teńiz betiniń lastaný aımaǵynyń ulǵaıýyna jol bermeý úshin munaı daqtaryn oqshaýlaý jáne joıý úlken uıymdastyrýshylyq, tehnıkalyq, tehnologııalyq kúsh jigerdi qajet etedi. Ókinishke qaraı, búgingi tańda Qazaqstan Respýblıkasynda belgilengen tártippen attestattalǵan, arnaıy tehnıkamen, materıaldarmen jaraqtalǵan, bilikti jáne tájirıbeli mamandardyń, qutqarýshylardyń jetkilikti sany bar bólimshe joq», - dedi Súıindik Aldashev.

Senatordyń aıtýynsha, mundaı qyzmetti qurýdyń taǵy bir sebebi - sýdaǵy tehnogendik qaýipsizdikti qamtamasyz etý boıynsha álemdik tájirıbede qoldanylatyn ádister qurǵaqtaǵy is-sharalardan túbegeıli erekshelenedi. Al eldiń Tótenshe jaǵdaılar mınıstrligi júıesindegi kúshter men quraldar, sonyń ishinde jedel-qutqarý jasaqtary ondaı mindetterdi oryndaı almaıdy.

Senator sondaı-aq mundaı arnaıy teńiz jedel-qutqarý qyzmetteri Kaspıı mańyndaǵy basqa elderde, atap aıtqanda Ázerbaıjanda, Reseıde jáne Túrikmenstanda qurylyp, jumys istep jatqanyn aıtty.