Senator temirjolshylardyń zeınet jasyn 55-ke deıin tómendetýdi usyndy

<p>&laquo;Qazaqstan temir joly&raquo; kompanııasynyń qatardaǵy qyzmetkerleriniń zeınet jasyn 55 jasqa deıin tómendetý kerek. Búgin Senattyń jalpy otyrysynda depýtat Gennadıı Shıpovskıh óziniń depýtattyq saýalynda osyndaı usynys aıtty, dep habarlaıdy Kazinform.</p>

Onyń sózine qaraǵanda, temirjol salasy qyzmetkerleriniń ómirin jaqsartý salasynda kóptegen problema bar. Tıisti memlekettik organ temirjolshylardyń negizgi máselelerin, onyń ishinde jalaqynyń tómendigin, turǵyn úıdiń joqtyǵyn jáne zeınetke shyǵý jasyn tómendetý máselesin áli sheshken joq.

Kólik mınıstrliginiń aqparaty boıynsha eń tómengi sanattaǵy «baılanys jáne belgi berý» mamandarynyń jalaqysy Aqtóbede 382 myń teńgeni, Qyzylordada 354 myń teńgeni, al eń tómengi sanattaǵy jol jóndeýshiniń jalaqysy Abaı jáne Pavlodar oblystarynda 280 myń teńgeni quraıdy. Biraq ta senator bul málimet shyndyqqa sáıkes kelmeıtinin jetkizdi.

«Óńirlerdegi temirjolshylardan alǵan málimetterge súıenetin bolsaq, eń tómengi sanattaǵy «baılanys jáne belgi berý» mamandarynyń qolǵa alatyn jalaqysy Aqtóbede jobamen 200 myń teńge, Qyzylordada 180 myń teńge, dál solaı eń tómengi sanattaǵy «jol jóndeýshiniń» jalaqysy Abaı oblysynda 160 myń teńge, Pavlodar oblysynda 205 myń teńgeni quraǵan. Mınıstrlik pen óńirlerdegi temirjolshylardan alǵan aqparat eki túrli. Biz qaısysyna senemiz? Árıne, halyqtyń aqparatyna senemiz», - dedi Gennadıı Shıpovskıh.

Senator osy derekterdi alǵa tarta otyryp, temirjolshylardyń máselelerin tolyǵymen sheshe alatyn birqatar sheshimder usyndy. Qazir bul salada 140 myńǵa jýyq adam jumys istep jatyr. Demek onyń ekonomıkalyq áseri de úlken bolady.

«Birinshiden, «Qazaqstan temir joly» ulttyq kompanııasynyń jyldyq tabysyn, memleketten beriletin sýbsıdııany jáne ınflıatsııany eskere otyryp, temirjol salasynyń qarapaıym jumysshylarynyń jalaqysyn kóterý kerek. Ekinshiden, temirjol salasyndaǵy qarapaıym jumysshylarǵa korporatıvtik kelisim nemese basqasha tetikterdi qarastyra otyryp, 55 nemese 57 jastan zeınetke shyǵarýdy qamtamasyz etý mańyzdy. Úshinshiden, temirjol qyzmetkerlerine arnalǵan turǵyn úı baǵdarlamasy ázirlenýi kerek, sondaı-aq baǵdarlamanyń tetikterin barlyq óńirge engizip, jergilikti atqarýshy organdarmen naqty algorıtmi jasalýy tıis», - dedi depýtat.