Senator tarıhı Qapal aýylyn saqtaý máselesin kóterdi

NUR-SULTAN. QazAqparat - Senator Baqytjan Jumaǵulov Úkimet basshysynyń atyna depýtattyq saýal joldady. Onda Jetisý jerinde, Uly Jibek jolynyń boıynda ornalasqan, tarıhy tereńnen tamyr tartatyn Qapal aýylynyń búgingi jaı-kúıine qatysty másele kóterilgen, dep habarlaıdy QazAqparat tilshisi.

Baqytjan Jumaǵulov Qapaldyń irgesi bekinis retinde 1847 jyly qalanǵanymen, shejiresi sonaý Túrki dáýirine, Qımaq memleketine baryp tireletinin aıtty.

Senator atalǵan derekterdi tizbekteı kele, Qazaqstannyń qasıetti jerleriniń kartasy daıyndalyp jatqan qazirgi kezde osyndaı san ǵasyrlyq tarıhy bar oryndar eskerýsiz qalmasa eken degen usynysyn aıtty.

«Elbasymyzdyń «Uly dalanyń jeti qyry» atty maqalasynan keıin respýblıka boıynsha qasıetti oryndar iriktelip jatyr. Bul tarıhymyzdy tanýǵa, týǵan ólkemizdiń ǵajaıyp jerlerin aıqyndaýǵa múmkindik beredi», – dedi Baqytjan Jumaǵulov.

Sonymen qatar senator bekinis retinde salyna bastaǵan kezeńde, ıaǵnı osydan eki ǵasyr buryn turǵyzylǵan nysandardy saqtap qalý máselesine de nazar aýdardy.

«XIX ǵasyrdyń eskertkishi bolyp sanalatyn úılerdiń bet jaǵy ǵana saqtalypty. Eski eki meshit úıi qaraýsyz qalyp, qulaǵan. Aýyldyń rýhanı ortalyǵy bolǵan aqyn Sara men Fatıma Ǵabıtova mýzeıleriniń izi de joq. Ondaǵy qundy eksponattar qaıda?», – degen Baqytjan Jumaǵulov bul jergilikti halyqtyń janaıqaıy ekenin aıtty.

Osyǵan oraı senator Premer-Mınıstrden sáýletshiler, tarıhshylar, ádebıetshiler, etnograftardan turatyn arnaıy komıssııa qurýdy, Qapal aýylynyń mádenı-tarıhı eskertkishterin qorǵaý úshin tıisti sharalar qabyldaýdy jáne olardy Úkimet qorǵaýyndaǵy sanattar qataryna qosýdy surady.