Senator Talǵat Júnisov Aqmola oblysynda jol jóndeý jáne dárigerlik-ambýlatorııalyq pýnkt salý máselesin qozǵady

<p>KÓKShETAÝ. KAZINFORM -&nbsp; Parlament Senatynyń depýtaty Talǵat Júnisov Aqmola oblysyndaǵy Astrahan jáne Bulandy aýdandarynyń turǵyndarymen kezdesti. Senator sapar barysynda birqatar ınfraqurylymdyq jáne áleýmettik nysandardy aralady.</p>

Depýtat Talǵat Júnisov Astrahan aýdanyndaǵy Staryı Kolýton aýylynda aýyl turǵyndarymen kezdesip, sýǵa shaıylyp ketken kireberis joldy jóndeý jáne dárigerlik-ambýlatorııalyq pýnkt salý máselelerin talqylady. Tasqyn kezinde aýylda 89 úı sý astynda qalǵan bolatyn. Komıssııa músheleri 28 úı apat jaǵdaıynda ekenin belgiledi. Depýtat osy másele boıynsha barlyq qajetti smetalyq qujattar bar ekenin, al jobalar qarjylandyrýdyń bastalýyn kútip otyrǵanyn atap ótti.

«Senatorlar óńirlerde jaıly ómirdi qalyptastyrý jónindegi aýqymdy da keshendi mindetterdi atqarýǵa jumylyp otyr. Azamattardyń bizge kelip túsken ótinishteriniń kópshiligi turǵyn úı, jol, jylý jáne sýmen jabdyqtaý máselelerine qatysty ekenin atap ótkim keledi. Bul máseleler mańyzdy jáne óńirdi damytý negiziniń biri bolyp tabylady. Biz jyl boıy osy máseleler boıynsha jergilikti atqarýshy jáne ókildi organdarmen, onyń ishinde osy aýdan ákimdigimen de tyǵyz jumys istedik», - dedi senator Júnisov.

Depýtat Bulandy aýdanyndaǵy Kapıtonovka jáne Ivankovka aýyldarynda tasqynnan zardap shekken azamattarǵa arnap salynyp jatqan úıler qurylysymen tanysty. Odan keıin Voznesenka aýylyndaǵy sharýa qojalyǵynyń alqaptaryn aralady jáne aýyldyń orta mektebinde júrgizilip jatqan jóndeý jumystaryn kórip shyqty. Osy bilim berý mekemesinde ol aýdan muǵalimderimen kezdesip, bilim berý salasyndaǵy ózekti máselelerdi talqylady.

«Halyqpen mundaı kezdesýlerdiń mańyzy zor. Memlekettik qoldaý isinde qıyndyqqa kez bolǵan nemese Senattyń aralasýyn qajet etetin problemaǵa tap bolǵanda óńirlerdiń múddesin bildiretin Palata retinde azamattarmen tikeleı keri baılanys jasaýǵa múmkindik beredi», - dep atap ótti senator Talǵat Júnisov.