Senator: Sýarý jelisi men gıdrotehnıkalyq qurylystar ábden tozǵan

QONAEV. QazAqparat – Parlament Senatynyń depýtaty Janbolat Jórgenbaev Almaty oblysyna sapary barysynda Kegen aýdanyndaǵy arnalar júıesin jańartý jumystarymen tanysty, dep habarlaıdy QazAqparat Palatanyń baspasóz qyzmetine silteme jasap.

Depýtat aýyl sharýashylyǵyndaǵy sýarý júıesiniń ózekti máselelerine, sondaı-aq fermerlerge jaǵdaı jasaýdy jan-jaqty pysyqtaý qajettigine nazar aýdardy. Ol sondaı-aq, jalpy respýblıka boıynsha aýyl sharýashylyǵyndaǵy ırrıgatsııa júıesiniń problemasy týraly aıta kelip, jergilikti jáne atqarýshy bılik organdarymen ózara is-qımyly arqyly máseleni sheshý joldaryn qarastyrdy.

«Sýarý jelisi men gıdrotehnıkalyq qurylystardy jańartpaý men jańǵyrtpaýdyń saldarynan jáne kúrdeli jóndeý jasamaı uzaq ýaqyt paıdalanǵannan keıin olardyń ábden tozǵany belgili bolyp otyr. Sýdy jibergen kezde shyǵyny kóbeıedi, sýarmaly jerler tolyq ıgerilmeıdi. Bul máseleni sheshý úshin respýblıkalyq bıýdjetten sýarý jelisin qaıta jańartýǵa 5 mıllıard 34 mıllıon teńge bólindi», - dep atap ótti senator.

Depýtat Raıymbek aýdanyndaǵy sýarý arnalarynyń jaı-kúıimen tanysyp, sý paıdalanýshylardyń ótinishterin tyńdady.