Senator sheteldikter asyrap alǵan balalar týraly tolyq aqparat berýdi surady

<p>Senator Ǵalıasqar Sarybaev Úkimet basshysynyń atyna joldaǵan depýtattyq saýalynda sheteldegi qazaqtardy qoldaý týraly birqatar másele kóterdi, dep habarlaıdy <a href="https://kaz.inform.kz/" target="_blank" rel="noopener">QazAqparat</a> tilshisi.</p>

Senatordyń aıtýynsha, resmı málimetterge sáıkes shetelde 4 mıllıonǵa jýyq, al beıresmı málimetterge sáıkes 7 mıllıonǵa jýyq qazaq turady. Depýtat olardyń kópshiliginiń tarıhı otanyna oralý nıeti bar ekenin aıtty. Alaıda, mundaı qadam jasaýǵa olarǵa tusaý bolatyn birqatar sebep bar.

«Qandastardyń elimizge kóptep kele almaýy sebebine toqtalsaq, basqa memleketterde ózderiniń ulty qazaq ekendigin dáleldeı almaı jatady. Al bilim berý salasyndaǵy aıyrmashylyqtar jáne basqa da máseleler kelgenderdiń múmkindigin shektep jatady», - dedi Ǵ. Sarybaev Úkimet basshysy Álıhan Smaıylovtyń atyna joldaǵan saýalynda.

Sonymen qatar depýtat halyqtyń kóshi-qon máselelerine qatysty qoldanystaǵy normatıvtik-quqyqtyq aktilerge jıi ózgerister men tolyqtyrýlar engiziletinin aıtty. Senator osyǵan baılanysty Úkimetten kóshi-qon salasynda júzege asyp jatqan memlekettik baǵdarlamalar týraly tolyq aqparat berýdi surady.

«QR Syrtqy ister mınıstrliginiń sheteldik dıplomatııalyq mekemelerinde qurylǵan arnaıy komıssııalardyń jumystaryn qaıta jandandyrý kerek. Ártúrli sebeptermen shetelde júrgen otandastarymyzdyń qıyn jaǵdaılarǵa tap bolǵanda olarǵa kórsetiletin kómekterdi qaıta zerdeleýdi, sondaı-aq 1990-2000 jyldary bala kezinde sheteldikter asyrap alǵan jetim balalardyń jaǵdaıy týraly tolyq aqparat berýdi suraımyn», - dedi Ǵalıasqar Sarybaev.