Senator: Shetelde kadr daıarlaýǵa bólingen aqsha tıimsiz ıgerilip jatyr

<p>Búgin Senattyń jalpy otyrysynda depýtat Andreı Lýkın Úkimet basshysy Álıhan Smaıylovtyń atyna joldaǵan depýtattyq saýalynda Halyqaralyq baǵdarlamalar ortalyǵynyń jumysyndaǵy kemshilikterdi atady, dep habarlaıdy <a href="https://kaz.inform.kz/" target="_blank" rel="noopener">Kazinform.&nbsp;</a></p>

Senator ortalyqtyń jumysy tıisti deńgeıde uıymdastyrylmaýynan, sondaı-aq Ǵylym jáne joǵary bilim mınıstrligi jaǵynan tıisti úılestirýdiń bolmaýynan shetelde kadrlardy daıarlaýǵa men olardyń biliktiligin arttyrýǵa bólingen qarajat tıimsiz ıgerilip jatqanyn nemese jymqyrylǵanyn atap ótti. Al bul óz kezeginde bıýdjettiń negizsiz shyǵyndaryna ákep soǵady.

«Stıpendıattardyń eńbek etýi men olardy oqytýǵa jumsalǵan bıýdjet qarjysyn óteýge monıtorıng júrgizetin tıimdi tetik joq. «Bolashaq» túlekteri halyqaralyq stıpendııany berýge arnalǵan úmitkerlerdi irikteý qaǵıdalaryna sáıkes Qazaqstanǵa oralý jáne mamandyǵy boıynsha úzdiksiz eńbek etý týraly talaptardy keıbir jaǵdaıda buzyp keledi. Osyndaı 1 myń derek belgili», - dedi A.Lýkın.

Depýtat qarjyny qaıtarý máselesine toqtalyp, memleketke 6,6 mlrd teńge somasyndaǵy bereshek týraly statıstıkany keltirdi.

«Joǵaryda atalǵan derekter oqytýdyń maqsatsyz baǵyttaryn pash etip otyr. Shetelde oqytylǵan mamandyq paıdalanylmaı jatyr. Bul joba jekelegen jaǵdaılarda emıgratsııa quralyna aınaldy, 270 túlek shetelde qaldy. Sonymen qatar joba oqý týrızmine aınalǵan. Ortalyq is júzinde eńbek naryǵynyń naqty qajetine sáıkes shetelde mamandar daıarlaýdy uıymdastyrý deńgeıiniń tómendigin kórsetip otyr. Buǵan strategııalyq jáne baǵdarlamalyq qujattardyń bolmaýy, salalyq mınıstrlik jaǵynan tıisti úılestirýdiń joqtyǵy sebep bolyp tur», - dedi senator.