Senator shekara mańyndaǵy turǵyndarǵa 2 paıyzdyq nesıe men 1,5 koeffıtsenttik eńbek ótilin berýdi usyndy
Senator Olga Býlavkına QR Premer-Mınıstri Álıhan Smaıylovtyń atyna joldaǵan depýtattyq saýalynda shekara mańyndaǵy aýmaqtardy damytý problemalaryn kóterdi. Depýtat qańtardaǵy qaıǵyly oqıǵalardy eske ala kelip, bul máseleni sheshýdiń asa mańyzdy ekenin atady.
Olga Býlavkına shekaralyq aýmaqtarda 1,5 mıllıonnan astam adam turatyny jáne bul kórsetkish jyl saıyn azaıyp kele jatqanyn jetkizdi. Aıtýynsha, buǵan mektepter men balabaqshalardyń jabylýy, agroónerkásip kesheniniń kenjelep qalýy, kásipkerlik áleýettiń, ınfraqurylym men turǵyn úıdiń bolmaýy sebep bolyp otyr.
Olga Býlavkına Senat depýtattarymen birlese otyryp, jumys kúshi artyq óńirlerden qonys aýdarýshylar men qandastarǵa shekara mańyndaǵy aýmaqtardyń tartymdylyǵyn kúsheıtý maqsatynda olarǵa turǵyn úı satyp alý men jalǵa alýǵa sýbsıdııany ulǵaıtýdy, sondaı-aq olarǵa materıaldyq kómek mólsherin otbasy músheleriniń sanyna qaraı 30-38 AEK-ke deıin ulǵaıtýdy usyndy. Sonymen qatar, qonys aýdarýshylar úshin jańa turǵyn úı salýǵa jáne qoldanystaǵy ǵımarattardy turǵyn úıge qaıta jańartýǵa arnalǵan shyǵystardy jumys berýshilerdiń óteýi de usynylyp otyr.
«Birinshiden, tıisti aýmaqtarda óńirlerdi damytý aıasynda qyzmet atqaratyn kásipkerlerge arnaıy salyq jeńildikteri men preferentsııalardy qoldaný kerek. Ol shaǵyn jáne orta bıznesti damytýǵa múmkindik berip, erkin ekonomıkalyq aımaqtar úlgisi boıynsha startaptardy iske asyrýǵa serpin qosady. Ekinshi, 2%-dan aspaıtyn mólsherleme boıynsha jeńildikti nesıe berýdi paıdalaný. Úshinshiden, eńbek ótiliniń eseptelýin 1,5-ke arttyrý koeffıtsıentin engizý, bul eńbek kúshi artyq óńirlerden eńbekke qabiletti qonys aýdarýshylardyń qosymsha aǵynyn tartýǵa múmkindik beredi. Joǵaryda atalǵan barlyq sharalar shekara mańyndaǵy aýmaqtardy damytýǵa yntalandyrady, eńbek resýrsynyń aýmaqtyq utqyrlyǵyn arttyrýǵa, memlekettik baǵdarlamalardy iske asyrýǵa bólinetin bıýdjet qarjysyn utymdy paıdalanýǵa múmkindik beredi», - dedi Olga Býlavkına.