Senator Shardara sý qoımasyna qatysty usynys aıtty

ASTANA. QazAqparat - Shardara sý qoımasy men Kóksaraı sý rettegishinde 6,5 mıllıard tekshe metr sý jınalyp otyr. Bul byltyrmen salystyrǵanda 2,3 mıllıardqa kóp. Bul týraly senator Bıbigúl Jeksenbaı QR Premer-Mınıstri Álıhan Smaıylovtyń atyna joldaǵan depýtattyq saýalynda aıtty, dep habarlaıdy QazAqparat tilshisi.

Depýtat osyǵan deıin Senattyń Halyqaralyq qatynastar, qorǵanys jáne qaýipsizdik komıteti memlekettik organdar jáne óńirlerdegi ákimdikterdiń ókilderimen kóktemgi sý tasqynyna daıyndyq máseleleri boıynsha kezdesý ótkizgenin eske saldy. Kezdesý barysynda múmkindiginshe jedel sheshilýi tıis birqatar máseleler anyqtalǵan.

Senatordyń aıtýynsha, qazirgi tańda jaýapty memlekettik organdardyń sý burý máselesin sheshýdegi áreketteriniń sáıkessizdigi baıqalady. Bul másele boıynsha osy ýaqytqa deıin mekemearalyq jumys toby qurylǵan joq.

Depýtat mamandar Shardara sý qoımasynda sekýndyna 1500 tekshe metr ótkizý qabileti bar apattyq drenajdyq arna salý qajet ekenin aıtyp otyrǵanyna toqtaldy. Bul máseleniń talaı kóterilgenine qaramastan, Úkimet naqty sharalar qoldanbaǵan.

Bıbigúl Jeksenbaıdyń paıymynsha, elimizdiń salalyq mınıstrlikteri Shardara sý qoımasyna keletin sý mólsherin azaıtý máseleleri boıynsha Ózbekstannyń ókilderimen kelissózder júrgizý qajet.

«Sý burý problemasyn sheshý tek memleketaralyq deńgeıde múmkin bolǵandyqtan, oǵan Qazaqstan Respýblıkasy Úkimetiniń kómegi qajet», - dedi senator.

Budan buryn habarlanǵandaı, bıyl aqpan aıynyń aıaǵynda Ekologııa jáne tabıǵı resýrstar mınıstri Zúlfııa Súleımenova Shardara men Kóksaraıdyń jaǵdaıy baqylaýda turǵanyn aıtty.