Senator Serik Óteshov Qaraǵandy oblysynda aýyl sharýashylyǵyn damytý máselelerin talqylady

QARAǴANDY. QazAqparat – Parlament Senatynyń depýtaty Serik Óteshov Qaraǵandy oblysynyń Osakarov aýdanynda aýyl eńbekkerleri, jergilikti qoǵam belsendileri, úkimettik emes uıymdardyń músheleri jáne ardagerler keńesiniń aqsaqaldarymen kezdesti, dep habarlaıdy QazAqparat Palatanyń baspasóz qyzmetine silteme jasap.

Kezdesýge qatysýshylar aýyl turǵyndarynyń ómirin jaqsartýǵa, jergilikti aýyl sharýashylyǵy taýaryn óndirýshilerdi qoldaýǵa, mańyzdy áleýmettik jáne ınfraqurylymdyq jobalardy iske asyrýǵa qatysty birqatar ózekti máseleni talqylady.

«Memleket basshysy aýyl sharýashylyǵy elimizdiń damýynyń basty draıveriniń biri ekenin birneshe ret atap ótken bolatyn. Biz ol týraly ár sessııada, árbir parlamenttik tyńdaý kezinde aıtyp kelemiz. Qazirgi ýaqytta memleketimiz aýyl sharýashylyǵy taýaryn óndirýshilerdi qoldaý jóninde naqty sharalar qabyldady. Degenmen, qolǵa alatyn kóptegen máseleler áli de bar. Meniń oıymsha, olardy birlese sheshý asa mańyzdy ekeni daýsyz. Saparymnyń basty maqsaty – Senat depýtattary zańnamalyq deńgeıde qandaı kómek bere alatynyn bilý, memlekettik baǵdarlamalardy oryndaýda qandaı jaǵdaı oryn alyp jatqanyn kórý», - dep atap ótti Serik Óteshov.

Senator balalar men jasóspirimderge arnalǵan «Jastar» ortalyǵynda jáne «Jas ınjener» stýdııasynda boldy. Jetim balalardy turǵyn úımen qamtamasyz etý, mektepte tamaqtandyrý, sondaı-aq balalardy bilim berý mekemelerine tasymaldaý máselelerin de talqylady.

Serik Óteshov Temirtaý qalalyq máslıhatynyń depýtattarymen jáne qoǵamdyq keńestiń múshelerimen kezdesti. Parlamentshilerdiń qyzmeti oblystyq jáne aýdandyq máslıhattardaǵy áriptesterimen tyǵyz qarym-qatynasy arqyly júzege asatynyn atap ótti. Senatta qurylǵan «Óńir» depýtattyq toby Qazaqstan óńirlerin damytý jóninde usynystar ázirleýmen aınalysatyny týraly jan-jaqty aqparat aıtyldy.