Senator Sarybaev 13 adam mert bolǵan oqıǵa jaıly: Qaýipsizdik sharalaryn qarastyrý qajet edi

<p>Senator Ǵalıasqar Sarybaev Almatydaǵy hostelde órtten 13 adam mert bolǵan oqıǵaǵa pikir bildirdi, dep habarlaıdy <a href="https://kaz.inform.kz/" target="_blank" rel="noopener">Kazinform.</a></p>

«Túndegi órtten qaza bolǵan azamattardyń týǵan-týystaryna qaıǵyryp kóńil aıtamyz. Keıingi kezde osyndaı keleńsiz jaıttar jıi oryn alyp jatyr. Mundaı jaǵdaılar qaıtalanbaýy tıis. Osyndaı keleńsizdikter memleketimizge, bárimizge syn. Bul jaıt qoǵamdyq-saıası ahýalymyzǵa áser etip, turǵyndardyń tarapynan alańdaýshylyq týdyryp jatqany belgili. Zań jaǵynan barlyq másele qabyldanýda. Azamattyq qorǵanys boıynsha zań engizip jatyrmyz. Onda bári jan-jaqty qarastyrylǵan. Árıne, azamattyq qorǵanys, órt sóndirý salasynda problemalar bar, joq emes. Sonyń bárin sheshýimiz qajet», – dedi Ǵalıasqar Sarybaev Senat otyrysynan keıin BAQ ókilderine bergen suhbatynda.

Sonymen qatar depýtat Táýelsizdik alǵan jyldardan bastap kóptegen jataqhana jekeshelendirilip ketkenine nazar aýdartty.

«Osyǵan oraı Memleket basshysynyń jataqhana salýǵa qatysty tapsyrmasy bar. Biraq, mınıstrlik jańadan jataqhana salý úshin jobalaryn jasap, saraptamadan ótkizýi, jer telimderin alýy qajet. Osyndaı rásimderge baılanysty barlyq stýdentti jataqhanamen qamtý úshin jekemenshik hostelderdi, kásipkerlerdiń jeke ǵımarattaryn paıdalanýǵa ruqsat berilgen edi. Bul alystan kelip oqıtyn jastarymyzǵa jaǵdaı jasaýdyń bir túri bolatyn. Biraq, qaýipsizdik sharalaryn qarastyrý qajet edi. Sol qaýipsizdik sharalary qaralmaǵan dep oılaımyn», – dedi senator.

Eske salaıyq, búgin Almatyda hostel órtenip, 13 adam qaza tapty. Qalalyq tótenshe jaǵdaılar departamentiniń málimetinshe, órt týraly habarlama 30 qarasha kúni saǵat 05:33-te túsken. Birinshi órt sóndirý bólimi shaqyrtý ornyna 7 mınýt ishinde jetti.

«Kelgen boıda 1-qabaty jáne jertólesi jataqhanaǵa aınalǵan 3 qabatty turǵyn úıdiń janyp jatqany anyqtaldy. Aldyn ala aqparat boıynsha órttiń jalpy aýdany — 30 sharshy metr. Qabyldanǵan sharalarmen órt 06:22-de joıyldy», — dep habarlady departamentten.

Órtten zardap shekken 2 adam qalalyq jedel shuǵyl kómek kórsetý aýrýhanasyna jetkizildi. Qalalyq densaýlyq saqtaý basqarmasynyń málimetine sáıkes, naýqastyń birine kómirqyshqyl gazynan ýlaný dıagnozy qoıyldy.

Hostelden 59 adam evakýatsııalanyp, 56-sy jaqyn mańdaǵy mektepke ýaqytsha ornalastyryldy.

Almatyda hostelde bolǵan órt týraly sońǵy málimetter myna jerde.