Senator sapasyz dári-dármektiń ımportyna tosqaýyl qoıý usynysyn aıtty

ASTANA. QazAqparat - Senator Aqmaral Álnazarova sapasyz dárilik zattardyń ımportyna tosqaýyl qoıýǵa qatysty usynys aıtty, dep habarlaıdy QazAqparat tilshisi.

Depýtattyń aıtýynsha, Ózbekstanda sapasyz dári-dármek saldarynan 19 balanyń qaıtys bolýyna alyp kelgen qaıǵyly jaǵdaı elimizge ákelinetin preparattardy muqııat qadaǵalaý qajet ekenin dáleldep otyr.

«Mundaı tájirıbe resmı túrde ákelinetin ári tirkelgen preparattardy jetkizýshilerdi de eleýli qaterge ushyratyp otyr. Bul jalpy otandyq farmatsevtıka salasynyń ınvestıtsııalyq tartymdylyǵyna nuqsan keltiredi. Mundaı qos standarttar adal óndirýshilerdiń sapaly preparattaryn naryqtan yǵystyryp shyǵarýyna ákelip soǵady», - dedi senator Premer-Mınıstrdiń atyna joldaǵan saýalynda.

Aqmaral Álnazarova Qazaqstanda tirkelmegen dári-dármekterdi ákelýge birneshe ret bir rettik ruqsat berý osyndaı qaıǵyly jaǵdaıǵa ákelýi múmkin ekenin atap ótti. Qazirgi ýaqytta naryqta otandyq jáne sheteldik óndirýshilerdiń tirkelgen ónimderi bolsa da, bir rettik ımport keńinen qoldanylyp keledi.

«Adamdar sapaly, qaýipsiz jáne tıimdi preparattar alýyna jaǵdaı jasaý jáne ishki naryqty tolyq qamtamasyz etý maqsatynda dárilik zattar aınalymyn retteý júıesiniń tásilderin qaıta qaraý kerek. Farmatsevtıkalyq ónimniń jańa túrlerine jedel aldyrtyp, dárilik zattardyń baǵasyn retteýdiń ashyqtyǵyn qamtamasyz etý baǵytynda tirkeý rásimderin ońtaılandyrý qajet», - dedi Aqmaral Álnazarova.