Senator patrıottyq tárbıe týraly zań jobasyn ázirleýdi usyndy

NUR-SULTAN. QazAqparat - Senator Dana Nurjigit elimiz jastarynyń áskerı-patrıottyq tárbıesine alańdaýshylyq bildirdi. Ol Premer-Mınıstrdiń atyna depýtattyq saýalynda jaǵdaıdy jaqsartýǵa yqpal etetin birqatar qadamdar usyndy, dep habarlaıdy QazAqparat tilshisi.

Búgingi kúni Qorǵanys mınıstrligine áskerı-patrıottyq tárbıe berý jónindegi jumystardy júrgizý zańnamamen bekitilip berildi. Ol patrıottyq tárbıe – bul barshaǵa ortaq is ekenine toqtala kelip, barlyq memlekettik organdar osy jumysqa jumylýy tıis ekenin atap ótti.

Senator osy maqsatta jeke zań jobasyn ázirleýdi jáne úılestirý organyn belgileý qajettigin aıtty.

«Búginde patrıottyq tárbıe berý júıesiniń áleýmettik-quqyqtyq mártebesi, róli, orny, maqsaty jáne patrıottyq tárbıe berý jumystaryn júrgizetin úılestirýshi organnyń qurylýy zańnamalyq turǵyda aıqyndalmaǵan. Árbir memlekettik organnyń, vedomstvonyń, uıymnyń qyzmetteriniń bir tarmaǵy patrıottyq tárbıege baǵyttalýy tıis ekeni kórsetilmegen. Bul máseleniń zań boıynsha rettelmeýi qoǵamdyq uıymdardyń, patrıottyq klýbtardyń materıaldy-tehnıkalyq bazasyna da áser etip otyr», - dedi Dana Nurjigit Senattyń jalpy otyrysynda.