Senator negizgi azyq-túlik baǵasyn ustap turýǵa qatysty usynys aıtty

ASTANA. QazAqparat - Resmı statıstıka boıynsha azyq-túlik baǵasy 20 paıyzǵa óskenimen, taýarlar is júzinde 50 paıyzǵa qymbattady. Bul týraly Senattyń jalpy otyrysynda depýtat Andreı Lýkın aıtty, dep habarlaıdy QazAqparat tilshisi.

Depýtat bul jaǵdaı jaýapty vedomstvolar jáne ákimdikter tıisti zańnamalyq retteý men áleýmettik mańyzy bar azyq-túlik taýarlarynyń saýdasyna ádisnamalyq áser etýdi qamtamasyz etpeıtindigine baılanysty týyndap otyr dep sanaıdy.

«Saýda qyzmetin retteý týraly» Zańdaǵy 9-baptyń áleýmettik mańyzy bar azyq-túlik taýarlaryna ústeme aqylardyń 15% asyp ketýine jol bermeý týraly talaptary deklaratıvti sıpatta bolady, ony is júzinde eshkim saqtamaıdy. Bıýdjet qarajatyn tıimsiz paıdalaný jáne urlaý, áleýmettik mańyzy bar azyq-túlik taýarlarynyń kólemin tıisinshe saqtamaý, laıyqty deńgeıde josparlamaý faktileri, sondaı-aq ákimdikter jumysyndaǵy kemshilikter turaqty zań buzýshylyǵyna aınaldy», - dedi depýtat Premer-Mınıstr atyna joldaǵan saýalynda.

Andreı Lýkın birde-bir ýákiletti organ osy saladaǵy zańnamany retke keltirý máselesin qolǵa almaı otyrǵanyn atap ótti. Senator osyǵan baılanysty azyq-túlik qaýipsizdigi salasyndaǵy jaǵdaıdy jaqsartý tetikterin usyndy.

«Kólik shyǵystaryn sýbsıdııalaı otyryp, áleýmettik mańyzy bar azyq-túlik taýarlaryn turaqtandyrý qorlaryna biryńǵaı jetkizý úshin iri otandyq taýar óndirýshilerine uzaq merzimdi memlekettik tapsyrystar qalyptastyrý qajet. Áleýmettik mańyzy bar azyq-túlik taýarlarynyń tómendetilmeıtin qoryn memlekettik materıaldyq rezervke uqsas belgileý kerek. Áleýmettik mańyzy bar azyq-túlik taýarlarynyń ishki naryǵyn kez kelgen jaǵymsyz qubylystardan qorǵaý tetikterin ázirleýdi qolǵa alý kerek», - dedi Andreı Lýkın.