Senator Mańǵystaý oblysyndaǵy jumyssyzdyq boıynsha Úkimetke saýal joldady
«Sońǵy kúnderi Mańǵystaý oblysynda, sonyń ishinde Jańaózen qalasynda oryn alyp otyrǵan jumyssyzdyqqa qarsy ereýilder óńirdiń ǵana emes, el jurtshylyǵyn alańdatyp otyr. Memleket basshysy Qasym-Jomart Toqaev Úkimettiń keńeıtilgen otyrysynda Mańǵystaý oblysyndaǵy jaǵdaıdyń qıyn, kúrdeli ekenine toqtalǵan bolatyn. Óńirdiń keshendi jospary qabyldanyp, osyǵan baılanysty qomaqty qarajattardyń bólinýi josparlanǵanyn, ol qarajattar birinshi kezektegi máselelerdi sheshýge baǵyttalyp, jumsalý kerektigi týraly aıtqan bolatyn.
Qańtar aıyndaǵy qaıǵyly oqıǵalardyń basy da osy Jańaózendegi beıbit aktsııadan bastalǵany málim. Suıytylǵan gaz baǵasynyń qymbattaýy degen resmı sebebi bolǵanymen, túp tamyry munaıshylar qalasynda jumyssyzdyqtyń keń oryn alýynda, turmystyq azyq-túlik taýarlarynyń qymbattap, áleýmettik deńgeıi tómendep ketýinde edi», - degen depýtat jumyssyzdyq máselesi óńirde óte ózekti ekenin basqa da mysaldarmen dáleldedi.
Depýtat qalany tek munaıǵa táýeldi etpeı, onyń damý baǵyttaryn ártaraptandyrýdy, onyń ishinde aýyl sharýashylyǵyn, týrızm salasyn damytýdy, kólik-logıstıka áleýetin kúsheıtýdi usyndy.
«Elimizdiń táýelsizdik alǵan 30 jylda Jańaózen qalasynyń turǵyndary 60 myń adamnan 160 myńǵa jetti jáne jyl saıyn 3500 adamǵa ósip otyr», - dedi senator.
«Búgingi tańda Ózen ken ornyn 100 paıyz «Qazmunaıgaz» ultyq kompanııasyna qarasty «ÓzenMunaıGaz» aktsıonerlik qoǵamy ıgerip otyr. Ken ornynda jylyna 5,3-5,5 mln tonna munaı óndiriledi. Mamandardyń aqparaty boıynsha, alýǵa bolatyn munaı qory shamamen 150 mln tonnadan astamdy quraıdy. Onyń ústine, jaqynda ǵana resmı aqparattar habarlaǵandaı, kólemi 39 mln tonna munaı kózi ashyldy. Bul qor qazir munaı óndirý deńgeıimen qaraǵanda, shamamen 30-35 jylǵa jetedi. Árıne, bul merzim tarıhı masshtabpen qaraǵanda kóp ýaqyt emes. Ekinshi jaǵynan qazirgi ozyq tehnologııalar kúnnen-kúnge damyp kele jatqan tsıfrlyq jıyrma birinshi ǵasyrdyń turǵysynan qaraǵanda az ýaqyt emes. Másele osy ýaqytta qanshalyqty utymdy paıdalana bilgenimizde», - degen depýtat ózi kótergen máseleniń birqatar sheshimderin usyndy.
«Ken ornyna qajet qural jabdyqtardyń, materıaldardyń tizimin jasap qaısybirin jergilikti shaǵyn, orta kásipkerlerine tikeleı tapsyryspen kópjyldyq merzimge berý kerek. Qala aýmaǵyna «Erekshe aýmaq» statýsyn berý múmkindigin qarastyrý, qajet bolsa, «ÓzenMunaıGaz» AQ jarǵysyna ózgeris engizýdi qarastyrý kerek, - dep atap ótti ol.