Senator Mamytbekov: Áleýmettik sala - basty nazarda

ASTANA. QazAqparat - Aldaǵy on jylǵa damýdyń basty baǵyty áleýmettik jańǵyrý bolmaq. QR Prezıdenti jarııa etken basty ıdeıa partııanyń baǵdarlamasy áleýmettik máselelerdi sheshýge baǵyttalǵan. «Nur Otan» partııasynyń mereıtoılyq XVIII sezindegi Elbasynyń bastamalary jóninde Senat depýtaty Edil Mamytbekov osyndaı pikir bildirdi, dep habarlaıdy QazAqparat.

«Nur Otan» partııasynyń mereıtoılyq XVIII sezinde partııanyń 2030 jylǵa deıingi baǵdarlamasy bekitildi. Memleket basshysy, «Nur Otan» partııasynyń Tóraǵasy N.Nazarbaev partııanyń aldynda turǵan 10 mindetti belgiledi. Aldaǵy on jylǵa damýdyń basty baǵyty áleýmettik jańǵyrýǵa baǵyttalady.

Elbasy jarııa etken basty ıdeıa partııanyń baǵdarlamasy áleýmettik máselelerdi sheshýge baǵyttalǵan. Bul halyqtyń ál-aýqatyn jaqsartý, turǵyndardyń tabysy men turmys deńgeıin arttyrý bolyp tabylady. Atqarýshy organdardyń nazarynan tys qalǵan áleýmettik saladaǵy negizgi máseleler atap ótildi», - deıdi Edil Mamytbekov.

Onyń aıtýynsha, Elbasynyń partııa sezinde qoıǵan basty mindeti áleýmettik máselelerdi sheshý bolǵan. «Buǵan basa nazar aýdarylyp, tıisti tapsyrmalar berildi. Qazaqstan saıasatynyń basty maqsaty áleýmettik baǵdar ekeni aıtyldy. Osy oraıda, áleýmettik baǵdarlamalardy sheshýge respýblıkalyq bıýdjettiń 45 paıyzynan astam qarjysy bólinetin bolady», - deıdi ol.

Senatordyń aıtýynsha, halyqtyń ál-aýqatyn jaqsartý úshin, eń aldymen ekonomıkanyń deńgeıi artýy tıis.

«Memleket basshysy ekonomıkany jetkilikti túrde qarjylandyrmaǵan aqsha-nesıe saıasatyndaǵy jeke máselelerge toqtaldy. Halyqtyń ál-aýqatyn jaqsartý úshin, eń aldymen ekonomıkanyń deńgeıi artýy tıis. Kópbalaly jáne áleýmettik az qamtylǵan otbasylarǵa, jastarǵa, densaýlyq saqtaý men bilim berý salalaryna qatysty máseleler aıtyldy. Osyǵan baılanysty Prezıdent áleýmettik salany jańǵyrtý úshin birqatar naqty tapsyrmalar berdi.

Odan basqa, Elbasy kedeılik shegin qaıta qaraý qajettiligine toqtaldy. Atap aıtqanda, 340 myń turǵyn úshin arnaıy áleýmettik kómek berý pysyqtaldy, sonyń ishinde kópbalaly otbasylarǵa da beriletin bolady. Bul rette, Úkimetke turǵyndarǵa beriletin áleýmettik kómektiń sharttaryn qaıta qaraý tapsyryldy. Ekonomıkanyń ósýine serpin beretin shaǵyn jáne orta bıznesti nesıemen qamtamasyz etý qajettiligi atap ótildi. 2030 jylǵa deıin shaǵyn jáne orta bıznestiń ishki jalpy ónimge qosqan úlesi 40 paıyzǵa deıin artýy qajet jáne bul óte mańyzdy mindet», - dedi Edil Mamytbekov.