Senator: Qorǵanystyq tapsyrystardy qazaqstandyq zaýyttarǵa berý kerek

NUR-SULTAN. QazAqparat - Qazaqstandyq kásiporyndardy qoldaýǵa arnalǵan memlekettik qorǵanystyq tapsyrystardyń biryńǵaı saıasatyn qalyptastyrýdyń mańyzy zor. Búgingi Senat otyrysynda depýtat Nurjan Nursıpatov osyndaı pikir bildirdi, dep habarlaıdy QazAqparat tilshisi.

Senator zańǵa táýeldi aktilerdi «Qorǵanys ónerkásibi jáne memlekettik qorǵanystyq tapsyrys týraly» Zań normalaryna sáıkes keltirýdi usyndy. Ekinshiden, erejelerdi jıi ózgertýdi doǵarý kerektigin aıtty.

«2019 jylǵy 14 qazanda zań normalaryn iske asyrý úshin Memlekettik qorǵanystyq tapsyrystardy qalyptastyrý, ornalastyrý jáne oryndaý erejeleri qabyldandy. Alaıda, 8 aıdan keıin ókiletti organ jańa Erejelerdi ázirlep, Úkimet ony bekitken. Zańnan keıingi aktilerdi jıi ózgertý bıznes qaýymdastyqqa, onyń qyzmetine keri áserin tıgizedi», – dedi Nurjan Nursıpatov Úkimet basshysynyń orynbasary Roman Sklıardiń atyna joldaǵan saýalynda.

Senat depýtaty Memlekettik qorǵanystyq tapsyrystardy qalyptastyrý, ornalastyrý jáne oryndaý erejesiniń jańa redaktsııasy oǵan otandyq bıznestiń qatysý múmkindigin tómendetetinin aıtyp, alańdaýshylyq bildirdi.

Nurjan Nursıpatov bul Prezıdenttiń óndiristi oqshaýlaý deńgeıin arttyrý týraly tapsyrmasyna qarama-qaıshy keletinin de atap ótti.