Senator qonys aýdarý baǵdarlamasyna qatysty usynystar aıtty

NUR-SULTAN. QazAqparat – Parlamen Senatynyń jalpy otyrysynda depýtat Álimjan Qurtaev elimizdiń ońtústik óńiriniń turǵyndaryn soltústik aımaqqa qonystandyrý jónindegi baǵdarlamanyń júzege asý barysyn synǵa aldy. Osy oraıda ol Úkimet basshysynyń orynbasary Eraly Toǵjanovtyń atyna depýtattyq saýal joldady, dep habarlaıdy QazAqparat tilshisi.

Senatordyń pikirinshe, ákimdikter kóbinese qonys aýdarýshylarǵa ómir súrý men eńbek etýge laıyqty jaǵdaı jasamaı otyr.

«Kóshýge nıet bildirgen otbasy qonys aýdarýshylardy qabyldaıtyn aýdandar týraly aqparatqa tolyqtaı qol jetkize almaıdy. Sondyqtan olardyń tańdaýy shekteýli bolyp otyr. Keıbir ákimdikter otbasyn qalaǵan aýylǵa emes, ákimdik ózi kórsetken aýylǵa jiberedi. Taǵy bir másele - turǵyn úı jaıy. Keıbir óńirlerde jańa jeke turǵyn úılerdi salý jumystarymen fermerlik sharýashylyqtar aınalysady jáne úılerdi resmı kelisý protsesin tolyq ótkizbesten sala beredi. BAQ-ta jarııalanǵan aqparatqa sáıkes, qurylystyń sapasy qoıylatyn talaptarǵa jaýap bermeıdi», - dedi Álimjan Qurtaev.

Senatordyń usynysy - túsindirý jumystaryn kúsheıtý. Ol úshin kem degende jiberýshi jáne qabyldaýshy salalarda Call-ortalyqtar ashý qajet. Onda qonys aýdarýshylarǵa tolyq aqparat jáne olardaǵy barlyq suraqtarǵa jaýaptar berilýi kerek.

«Atalǵan Call-ortalyqtardyń tıimdi jumys isteýi úshin bos jumys oryndary, turǵyn úımen qamtamasyz etý, kórsetilgen oblystarda sharýashylyqtyń qandaı túrimen aınalysýǵa bolatynyn, sondaı-aq máseleler boıynsha kóshýge nıet bildirgen azamattardy habardar ete alatyn mamandardy tartý kerek», - dedi depýtat.

Senator bank nesıeleri bar kóship-qonýshylarǵa 6 aıdan 1 jylǵa deıingi merzimge nesıelik demalys berýdi usynyp otyr. Bul kóbinese kóshý protsesinde týyndaıtyn qaryzdardan keıin azamattarǵa sýbsıdııa berýden bas tartylatyn bolǵandyqtan asa mańyzdy.