Senator qazaq-qyrǵyz shekarasynda júkti tekserýge qatysty usynys aıtty

<p>ASTANA. KAZINFORM &ndash; Senator Andreı Lýkın óziniń depýtattyq saýalynda qazaq-qyrǵyz shekarasyndaǵy ótkizý beketinde júk tasymalyna tıisti baqylaýdyń joqtyǵy týraly aıtty.</p>

Depýtattyń sózine qaraǵanda, osy ótkizý pýnktinde kontrabanda men tyıym salynǵan zattardy anyqtaýmen tek shekara qyzmeti aınalysady. Onda da tek kózben sholyp tekserý júrgizetin bolyp shyqty. Ol tek sońǵy 3 jyldyń ishindegi jaǵdaı. Bul kezeńde Qyrǵyzstannan Qazaqstanǵa «Shaldýar» stantsııasy arqyly 190 myń tonna júk ımporttalyp, 3 mln 565 myń tonna eksporttaldy.

«Bekette ónim men shıkizat úlgilerin zerdeleý múmkindigi joq, nátıjesinde zańdy taýar retinde tyıym salynǵan júkterdi tasymaldaý qaýpi joǵary. Bul elimizdiń ekonomıkalyq qaýipsizdigine de teris áser etedi. Tıisti baqylaýdyń bolmaýy Qyrǵyzstanmen shekaralas óńirlerdi qylmys jaılaýyna jáne taýarlardy zańsyz tasymaldaýmen aınalysatyn toptardyń paıda bolýyna ákeledi», - dedi A.Lýkın Úkimet basshysy Álıhan Smaıylovtyń atyna joldaǵan saýalynda.

Senator osyǵan baılanysty Úkimetke osy bekette júkterdiń qozǵalysyn baqylaý tártibin retteıtin jáne kúsheıtetin normatıvtik-quqyqtyq akti qabyldaýdy usyndy.

«Quqyqtyq olqylyqty joıý, sondaı-aq zań erejesiniń buzylýyn boldyrmaý maqsatynda «Shaldýar» beketinde arnaıy baqylaý pýnktin ashý, vagondardy qaraý jyldamdyǵy men sapasyn arttyratyn ádisterdi engizý, ótkizý pýnktterinde keptelisterge jol bermeý úshin jeke oryndardy aıqyndaý, sondaı-aq elimiz ishinde taýardy túsirip alýǵa jol bermeý úshin EAEO elderine jiberiletin tranzıttik vagondarda elektrondy navıgatsııalyq plombalardy qoldanýdy usynamyn», - dedi depýtat.