Senator qandastarǵa arnalǵan kvota sanyn kóbeıtýdi usyndy

<p>ASTANA. KAZINFORM &mdash; Reseıdegi &laquo;Crocus City Hall&raquo; ǵımaratynda bolǵan qaıǵyly jaǵdaıdan keıin elimizge eńbek mıgranttarynyń aǵylatyny boljanyp otyr. Senator Darhan Qydyráli óziniń depýtattyq saýalynda olardyń bizdiń elimizge zańsyz kelýine baılanysty ulttyq qaýipsizdikke áser etetin problemalardy kóterdi.</p>

«Mıgranttar týraly júıeli áleýmettik zertteýler júrgizý qajet. Mıgratsııa – adamdardyń beı-bereket qozǵalysynyń mehanıkalyq protsesi ǵana emes. Ol, eń aldymen, beıimdelý úrdisi, áleýmettik jaǵdaı men ómir saltynyń ózgerýi. Sondyqtan eńbek mıgranttary men qonys aýdarýshylarǵa aqparattyq, zańnamalyq, tildik, mádenı qyzmet kórsetetin arnaıy beıimdeý ortalyqtary bolýy kerek», - dedi D. Qydyráli Úkimet basshysy Oljas Bektenovtiń atyna.

Sonymen qatar senator qandastardy kóshirý jáne olar úshin kvotalardy ulǵaıtý máselesin de qozǵady.

«Eńbek jáne áleýmettik qorǵaý mınıstrligi ázirlegen «Ata joly» kartasynyń múmkindikteri zańdy túrde bekitilýi tıis. Bul karta etnıkalyq qazaqtarǵa beriletin qandas mártebesimen teńestirilýi kerek. Qandastarǵa beriletin kvotany da kóbeıtý qajet. Máselen, Aqmola oblysyna bólingen 285 kvota qańtar aıynda, Rýdnyıǵa bólingen 200 kvota aqpan aıynda ıgerilip qoıǵan. Qazaqstanǵa kelgenderdiń basym bóligi Mańǵystaý óńirine turaqtaǵanyn eskersek, soltústikke qonys aýdarý baǵdarlamasyna ońtústikpen birge batys aımaqtardy da qosqan abzal dep oılaımyz. Sonymen birge, soltústik óńir ákimdikteri halyq kóbirek kóshetin aýdandarda front-ofıs túrinde ókildikter ashyp, túsindirý jumystaryn arttyrǵany jón», - dedi depýtat.

Senator Úkimet basshysy Oljas Bektenovke osy problemalarǵa nazar aýdarýdy jáne olardy sheshý úshin tıisti shara qabyldaýdy surady.