Senator ınternet-alaıaqtyq úshin jazany qatańdatýdy usyndy

<p>ASTANA. KAZINFORM &ndash; Internet-alaıaqtyq máseleleri qarqyn alyp keledi. 2024 jyldyń 8 aıynda elimizde osyndaı 11 765 qylmys tirkelgen. Senator Ásem Rahmetova óziniń depýtattyq saýalynda osy problemamen kúresý sharalaryn usyndy.</p>

Qylmyskerler kún sanap jańa aılaǵa úırenip jatyr. Bul turǵyda senator ІІM jáne basqa da memlekettik organdar qabyldaǵan keshendi sharalarǵa qaramastan, qarqyndy profılaktıkalyq jumysty jalǵastyrý kerek ekenin aıtty jáne qazaqstandyqtardy qorǵaýdy kúsheıtý qajet dep sanaıdy.

«Іshki ister mınıstrligi men «Qazaqtelekom» AQ-men ózara is-qımyl nátıjesinde antıfrod júıesimen 1,9 mln astam shetelden baǵyttalǵan alaıaqtyq telefon qońyraýlary buǵattalǵan. Tsıfrlyq damý, ınnovatsııalar jáne aeroǵarysh ónerkásibi mınıstrliginiń uıaly baılanys operatorlarymen birlesip, «aýystyrylatyn nómirlerden» 58 mln sheteldik telefon qońyraýyn toqtatqan. Ulttyq bankpen birlesip antıfrod ortalyqty qurý arqyly shetelge ketip qala jazdaǵan 395 mln teńge buǵattalǵan», - dedi Á. Rahmetova.

Depýtat osyǵan baılanysty tanymal áleýmettik jelilerde turaqty aqparattyq is-sharalar júrgizýdi usyndy.

«Azamattar kúdikti áreketter týraly habarlaı alatyn jáne keńes ala alatyn arnaıy senim telefondary men onlaın-platformalardy ázirleý kerek. Bul is-sharalar azamattardyń alaıaqtyqpen baılanysty táýekelder týraly habardarlyǵyn arttyryp qana qoımaı, qylmys jasaý múmkindigin azaıtady jáne qaýipsiz ári qorǵalǵan tsıfrlyq ortany qurýǵa múmkindik beredi», - dedi senator.