Senator elimizde qant dıabetimen kúresý jónindegi ulttyq baǵdarlama ázirleýdi usyndy
Senator Rysqalı Ábdikerov elimiz Premer-Mınıstri Álıhan Smaıylovtyń atyna joldaǵan depýtattyq saýalynda osy máselelerdi atady, dep habarlaıdy QazAqparat tilshisi.
Depýtat Halyqaralyq qant dıabeti federatsııasynyń málimeti boıynsha byltyr álemde eresekter arasynda 537 mln qant dıabeti syrqatynyń tirkelgenin atap ótti. Qazaqstanda bul kórsetkish shamamen 450 myń adamdy quraıdy. Onyń ishinde 5,5 myńǵa jýyǵy 17 jasqa deıingi balalar bolyp otyr.
«Elimizde aýyr dertke shaldyqqandar sany odan da kóp bolýy múmkin. Sebebi, atalmysh dert kópke deıin belgi bermeıtindikten, naýqastardyń kóbisi asqynǵan kezde ǵana dárigerge júginedi. Árıne, bizdiń elimizde osyndaı naýqastar emdelý úshin ambýlatorııalyq deńgeıde qantty tómendetetin dárilik zattarmen, medıtsınalyq zattarmen qamtamasyz etiledi. Sonymen qatar, búgingi tańda qant dıabeti – Qazaqstandaǵy eń qymbat áleýmettik mańyzy bar aýrýlardyń biri. Resmı aqparat boıynsha, naýqastardy dári-dármekpen qamtamasyz etý úshin bıyl 30 mlrd teńgege jýyq qarajat bólingen», - dedi senator.
Depýtattyń aıtýynsha, el óńirlerinde endokrınolog-dárigerlerdiń jetispeýshiligi de ózekti másele bolyp otyr. Qazirgi kezde Qazaqstanda jeke sektorda jumys isteıtinderdi qosqanda 900-den astam osyndaı maman bar ekenin aıta ketken jón.
«Úkimet joǵaryda aıtylǵan máselelerdi eskere otyryp, qant dıabetimen tıimdi kúresý úshin bastapqy profılaktıka men patologııany erte anyqtaýǵa baǵyttalǵan qant dıabeti boıynsha Ulttyq baǵdarlamany ázirleýdi suraımyn. Oǵan kelesi baǵyttardy qosýdy usynamyn: Qazaqstanda mamandandyrylǵan dıabettik kómek kórsetýdiń zamanaýı júıesin qurý, kórsetiletin kómektiń sapasyn arttyrý maqsatynda dıagnostıkanyń jáne emdeýdiń zamanaýı ádistemelerin engizý, júktilik kezinde ana men bala ólimin azaıtý úshin qant dıabetin ýaqytyly jáne der kezinde emdeý kerek», - dedi senator.
Photo: westernhospital.lk