Senator elge kelgen qandastarǵa tólqujatty Naýryz merekesinde tabystaýdy usyndy

NUR-SULTAN. QazAqparat – Senat depýtaty Altynbek Nýhuly Naýryz merekesin toılaý kúnderinde elge oralǵan qandastardyń otbasylary men basqa etnos ókilderine qazaqstandyq pasportty saltanatty tapsyrý rásimin dástúrge aınaldyrýdy usynyp otyr. Bul týraly depýtat Úkimetke joldaǵan saýalynda aıtty, dep habarlaıdy QazAqparat tilshisi.

Senattyń jalpy otyrysynda depýtat áz Naýryzdy toılaýǵa qatysty birneshe usynysyn jarııa etti. Senator eriktilerdiń belsendi qatysýymen ótetin «Naýryz meıirimi» jalpyulttyq aktsııasy sekildi sharalarynyń mańyzyn atap ótti.

«Jas urpaqqa ekologııalyq tárbıe berý úshin aýmaqtardy abattandyrý, bulaqtardyń kózin ashý men aǵash otyrǵyzýdy dástúrge aınaldyrý qajet. Ońtústik óńirlerde Naýryz merekesinde jáne mundaı aktsııany qolaıly klımat keshirek keletin soltústik óńirlerde keıinirek uıymdastyrý qajet dep sanaımyz. Sonymen qatar, elge oralǵan qandastardyń otbasylary men basqa etnostardyń ókilderine mereke kúnderi qazaqstandyq pasportty saltanatty tapsyrý rásimi engizilse, sımvoldyq túrǵydan quba-qup bolar edi», - dedi Altynbek Nýhuly.

Zaman talabymen úndesetin buqaralyq sharalardy óskeleń urpaqqa, qasterli Otanyń men otbasyńa, týǵan topyraǵyńa súıispenshilikpen nasıhattaý mańyzdy.

Depýtattyń sózine qaraǵanda, Naýryzdyń ıdeıalyq mazmunyn balalar men jastar aýdıtorııasyna áleýmettik jeli jáne ózge de keńistiktegi sharalar arqyly sińirýdiń máni aıryqsha.

Senator óz saýalynda ulttyq qundylyqtardyń nasıhaty men rýhanı damý, memlekettik tildiń mártebesin arttyrý taqyrybyndaǵy ózekti oılaryn ortaǵa saldy.