Senator eldegi jol apattaryna qatysty jaǵdaıǵa alańdaýshylyq bildirdi

NUR-SULTAN. QazAqparat – Senator Aqmaral Álnazarova elimizde jol-kólik oqıǵalary boıynsha kúrdeli jaǵdaı qalyptasqanyn aıtty. Ol Premer-Mınıstrge joldaǵan depýtattyq saýalynda jaǵdaıdy jaqsartýǵa kómektesetin naqty qadamdar týraly baıandady, dep habarlaıdy QazAqparat tilshisi.

Senatordyń málimetinshe, ótken jyldyń ózinde jol apattarynan 40 593 adm zardap shekken. Bul 2020 jylǵy kórsetkishten 30%-ǵa joǵary.

Depýtattyń pikirinshe, bul jol ınfraqurylymynyń sáıkes kelmeýinen, júrgizýshi kýálikterin berý kezindegi baqylaýdyń nasharlyǵynan, polıtseılerdiń alǵashqy medıtsınalyq kómek kórsetýdegi praktıkalyq daǵdylarynyń jetkiliksizdiginen bolyp otyr. Joldardaǵy osyndaı jaǵdaıdyń bári eldiń demografııalyq damýyna qaýip tóndiredi.

«Jol-kólik oqıǵalaryndaǵy ólim-jitim boıynsha álemdik reıtıngte Qazaqstan 107-orynda tur. Halyqaralyq sarapshylar jol-kólik oqıǵalarynan bolatyn elimizdiń ekonomıkalyq shyǵyndary jalpy ishki ónimniń 3% kóleminde dep baǵalaǵan. Sońǵy 5 jylda 1 971 adam jol apaty saldarynan múgedektikke tap boldy.», - dedi depýtat Senattyń jalpy otyrysynda.

Aqmaral Álnazarova jol-kólik jaraqatynyń aldyn alatynymyzǵa senimdi, biraq bul júıeli jáne keshendi sharalardy talap etedi. Jol júrisine qatysýshylardyń ómiri men densaýlyǵynyń basymdyǵy jáne qaterdi azaıtý jol júrisiniń negizgi qaǵıdaty bolyp qalýǵa tıis.